कैलाली – कैलालीमा घरेलु विवादले ज्यान लिने घटनामा परिणत भएको छ। श्रीमानको कुटपिटबाट गम्भीर घाइते भएकी एक महिलाको उपचारका क्रममा मृत्यु भएको छ।
धनगढी उपमहानगरपालिका–८ स्थायी घर भई हाल धनगढी–१३ राजपुरमा डेरा गरी बस्दै आएका सतिङ दाहालले घरायसी विवादका क्रममा आफ्नी ३० वर्षीया श्रीमती हिरा दाहालमाथि कुटपिट गरेका थिए। कुटपिटबाट गम्भीर घाइते भएकी हिरालाई उपचारका लागि सेती प्रादेशिक अस्पताल, धनगढी लगिएको थियो।
अस्पतालमा उपचारकै क्रममा हिरा दाहालको सोमबार मृत्यु भएको जिल्ला प्रहरी कार्यालय कैलालीले जनाएको छ।
घटनापछि मृतकका श्रीमान सतिङ दाहाललाई प्रहरीले पक्राउ गरेको छ। उनलाई नियन्त्रणमा लिएर घटनासम्बन्धी आवश्यक अनुसन्धान अघि बढाइएको प्रहरीको भनाइ छ।
