मध्यपुरथिमि–२ सानोथिमिस्थित बाल सुधारगृहमा बिहीबार राति झडप र आगजनीको घटना भएको छ। सुधारगृहभित्र रहेका दुई समूहबीच भएको विवाद झडपमा परिणत भई आगजनी र तोडफोडसमेत भएको हो।
झडप सुरु भएपछि थिमी प्रहरी वृत्तका प्रमुख नवराज ढुङ्गानाको नेतृत्वमा प्रहरी टोली घटनास्थल पुगेको थियो। स्थिति नियन्त्रणमा लिने क्रममा झडपमा संलग्न दुवै समूहले प्रहरीमाथि ढुङ्गामुढा गरेका थिए। अवस्था नियन्त्रण बाहिर गएपछि सशस्त्र प्रहरी बलका ५० जना सुरक्षाकर्मी परिचालन गरिएको प्रहरीले जनाएको छ।
मध्यरातमा भक्तपुर र काठमाडौंका वारुणयन्त्रको सहयोगमा आगो निभाइएको थियो। आगजनीबाट भएको क्षतिको विवरण भने आउन बाँकी रहेको थिमी प्रहरी वृत्तले जनाएको छ।
उक्त बाल सुधारगृहमा हाल १४५ पुरुष र २४ महिला गरी जम्मा १६९ जना रहेका छन्। हाल स्थिति नियन्त्रणमा आइसकेको भए पनि सम्भावित घटनालाई मध्यनजर गर्दै सुधारगृह क्षेत्रमा बाक्लो सङ्ख्यामा सुरक्षाकर्मी परिचालन गरी निगरानी बढाइएको छ।
