विराटनगर । मोरङको रङ्गेली नगरपालिका-४ मा जनप्रतिनिधिहरूबीच भएको विवादले स्थानीय राजनीति तरङ्गित भएको छ।
बाटो निर्माणको अनुगमनको क्रममा सुरु भएको विवाद कुटपिटसम्म पुगेको आरोप लागेपछि जनप्रतिनिधिहरू नै प्रहरी कार्यालय अगाडि धर्नामा बसेका छन्।
वडा अध्यक्ष अवदेश मण्डलका अनुसार, वडा सदस्य रमेश मण्डलसँग बाटो निर्माणको निरीक्षणमा जाँदा अर्का वडा सदस्य मुकेश मण्डलले ‘मल किन नदिएको’ भन्ने विषय उठाएका थिए ।
सानो विवाद बढ्दै जाँदा रमेशमाथि हातपात भएको वडा अध्यक्षको दाबी छ।
प्रहरीमा उजुरी दिँदा पनि कुनै सुनुवाइ नभएको भन्दै जनप्रतिनिधिहरू रुष्ट छन् । “अब जनप्रतिनिधि नै असुरक्षित भएका छौँ, प्रहरी मुखदर्शक बनेर बस्नु गम्भीर कुरा हो,” उनीहरूले भने ।
रोचक कुरा के छ भने मुकेश मण्डल करिब दुई महिना अघि नै वडा सदस्य पदबाट राजीनामा दिइसकेका छन् ।
उनले आफूलाई वडाबाट निरन्तर वञ्चित गरिएको र उल्टै आफूलाई नै हातपात गरिएको दाबी गरेका छन् ।
इलाका प्रहरी कार्यालय रङ्गेलीका इन्सपेक्टर नरेन्द्र बोगटीले घटनालाई गम्भीरतापूर्वक लिइएको र अनुसन्धान भइरहेको जानकारी दिएका छन् ।
रङ्गेली नगरपालिकाको वातावरण तनावग्रस्त बनेको छ भने प्रहरीको निष्कर्ष के आउँछ भन्ने अब हेर्न बाँकी छ।
