विराटनगर । युवा नेता तथा सामाजिक अभियन्ता अभिषेक गिरीको अगुवाइमा विराटनगरका १५० युवा नेपाली कांग्रेसमा प्रवेश गरेका छन् ।
नेपाली कांग्रेस वडा कार्यसमिति वडा नं. ८, विराटनगर महानगरपालिकाको आयोजनामा शनिबार थानगाढीस्थित सप्तकोशी बोर्डिङ छेउमा आयोजित विशेष कार्यक्रममा १५० जना युवा पुस्तालाई पार्टीमा प्रवेश गराइएको हो ।
उक्त कार्यक्रममा विभिन्न तहतप्कामा रहेका युवाहरूलाई नेपाली कांग्रेसको सिद्धान्त तथा विचारलाई आत्मसात गर्दै लोकतन्त्रको चीरस्थायी प्रयोजनमा समाहित गर्ने उद्देश्यले पार्टी प्रवेश गराइएको थियो।
हालै भएको जेनजी विद्रोहपछि राजनीतिक पार्टीप्रति वितृष्णा बढिरहेका बेला यो पहल विशेष महत्त्वपूर्ण मानिएको छ।
वडा सभापति सिर्जन आचार्य (मुकेश) को अध्यक्षतामा भएको कार्यक्रममा गिरी फाउण्डेसनका अध्यक्ष तथा समाजसेवी अभिषेक गिरीले युवा पुस्तामा कांग्रेसप्रतिको आकर्षण बढ्दै गएको धारणा राखे ।
पार्टी प्रवेशको लहरले जेनजी समूहले कांग्रेसलाई विश्वास गरेको उनको भनाइ थियो ।
कांग्रेस बलियो भयो भने मात्रै देश र जनता बलियो हुने बताउँदै गिरीले कांग्रेसलाई बलियो बनाउन सबै एकजुट भएर लाग्नुपर्नेमा जोड दिए ।
सो अवसरमा विभिन्न पार्टी परित्याग गरी १ सय ५० जनाभन्दा बढी कांग्रेसमा प्रवेश गरेका थिए ।
कार्यक्रमका प्रमुख अतिथि कोइरालासहित महासमिति सदस्यद्वय गच्छदार, रिजाल, क्षेत्रीय सभापति विनोद बस्नेत, विराटनगर महानगर समितिका सभापति दीपक चापागाईं, क्षेत्र नम्बर ४ (ख)का सभापति सुबोध निरौला, सचिव सन्तनु रेग्मी, युवा नेता कृष्ण कार्की, मुकेश घिमिरेलगायतले अविर, खादा लगाएर नवप्रवेशीहरुलाई पार्टीमा स्वागत गरेका थिए ।
युवापुस्ताले राजनीतिमा सक्रिय भूमिका खेल्नुपर्ने माग सर्वत्र उठिरहेका बेला गिरीले युवा पंक्तिलाई संगठित गरेर कांग्रेसमा समाहित गर्न सफल भएका हुन्।
गिरी फाउन्डेसनमार्फत सार्वजनिक तथा निजी अस्पताल सुधार, सामुदायिक विद्यालय सुधार, स्वदेशमै रोजगारी, सरसफाइ अभियान, कोशी अस्पताल सुधार अभियान, वृक्षारोपण अभियान जस्ता सामाजिक कार्यहरूमा गिरी सक्रिय रहेका छन् ।
कांग्रेसको आसन्न १५औं महाधिवेशन (पुस २६–२८, काठमाडौं) अघि विराटनगर महानगरपालिकामा हुने अधिवेशनका लागि गिरी सभापतिको दाबेदारी गर्ने चर्चा तीव्र भइरहेको छ ।
उनले युवापुस्ताको साथ र पार्टीको निर्देशन भएमा नेतृत्व लिन तयार रहेको स्वीकारेका छन्।
युवा कार्यकर्ताहरू गिरीको सम्भावित उम्मेदवारीप्रति आशावादी देखिएका छन् र उनी सभापति बनेमा कांग्रेस आबद्ध मात्र नभई अन्य युवापुस्तालाई पनि समेट्न सकिने विश्वास व्यक्त गरेका छन्।
कांग्रेस विराटनगर महानगरको नेतृत्व चयनले मोरङको राजनीतिमा महत्त्वपूर्ण प्रभाव पार्ने भएकाले यसपटकको महाधिवेशन विशेष चासोको विषय बनेको छ।
