विराटनगर । शैक्षिक उत्कृष्टताको प्रतीक बन्दै आएको विराटनगरको कान्तिपुर कलेजले चिकित्सा शिक्षा आयोगले लिएको एमबिबिएस प्रवेश परीक्षामा नाम निकाल्न सफल राजनारायण महतोसहित आफ्ना विद्यार्थीहरूलाई सम्मान गरेको छ ।
विराटनगर महानगरपालिका–१० मा अवस्थित कलेजले शुक्रबार एक कार्यक्रमको आयोजना गर्दै एमबिबिएस प्रवेश परीक्षामा सफल बनेका तीन विद्यार्थीसहित वार्षिक परीक्षामा अब्बल अंक ल्याएका विद्यार्थीहरूलाई सम्मान गरेको हो ।
एमबिबिएस प्रवेश परीक्षामा सामेल भएका १८ हजार परीक्षार्थीहरूमध्ये राजनारायणले ३९औं नम्बरमा नाम निकाल्न सफल भएका थिए । कक्षा १२ को परीक्षामा नेपालकै सर्वोत्कृष्ट नतिजा ३.९६ जिपिए ल्याएका राजनारायणलाई कलेजले एक लाख एक हजार रुपैयाँ नगदसहित सम्मान गरेको थियो ।
कान्तिपुरमा अध्ययन गरेका मिर्चैया नगरपालिकाका राजनारायणका दाजु राजु महतो पनि अघिल्लो वर्ष एमबिबिएसमा नाम निकाल्न सफल भएका थिए । कान्तिपुर कलेज रोजाइकै कारण आफ्नो सफनाले सार्थकता पाएको बताउँदै राजनारायणले आफूलाई ‘गाइड’ गर्ने शिक्षक–शिक्षिकालाई धन्यवाद दिए ।
विराटनगरबाट पहिलोपटकमै नाम निकालेका एकमात्रै छात्र राजनारायणसहित यस कलेजबाट एमबिबिएसको प्रवेश परीक्षा उत्तीर्ण गरेका करुणाकुमारी साह र प्रिन्सन श्रेष्ठलाई पनि सम्मान गरिएको थियो ।
त्यसबाहेक कलेजले कक्षा ११ र १२ को विज्ञान, व्यवस्थापन र होटल व्यवस्थापनअन्तर्गत वार्षिक परीक्षामा अब्बल अंक ल्याएका १२ जना विद्यार्थी र तीनै संकायबाट त्रैमासिक परीक्षामा उत्कृष्ट अंक ल्याउने १८ जना विद्यार्थीहरूलाई सम्मान गरेको थियो । साथै, कलेजले उत्कृष्ट ३१ जना विद्यार्थीलाई २१ लाख रुपैयाँ बराबरको छात्रवृत्ति प्रदान गर्ने उद्घोषसमेत गरेको छ ।
यसैगरी, कलजले विगत एक दशकयता कार्यालय सहयोगीका रूपमा कार्यरत सीता कार्कीलाई १५ हजार रुपैयाँको सम्मानसहित बिदाइ गरेको थियो ।
सम्मान कार्यक्रममा बोल्दै कलेजका प्रिन्सिपल भुवन नेपालले कान्तिपुर शिक्षक र विद्यार्थीको लगनशीलताका कारण प्रत्येक वर्ष मेडिकल, इन्जिनियरिङ, पारा मेडिकल, सिएलगायत विभिन्न विधामा नाम निस्किने गरेको बताए । आगामी दिनमा पनि यस्तै सफलता दोहोर्याउँदै जाने प्राचार्य नेपालको प्रतिबद्धता छ ।
कान्तिपुर कलेजका निर्देशक विष्णु दाहाल, अध्यक्ष खुशीराज श्रेष्ठलगायतले आफ्नो मन्तव्य राखेको कार्यक्रममा शिक्षक, कर्मचारी, अभिभावक र विद्यार्थीहरूको उपस्थिति रहेको थियो ।
कोशी प्रदेशकै अग्रणी शैक्षिक संस्थाका रूपमा कहलिएको कान्तिपुरमा हाल तीन हजार हाराहारीमा विद्यार्थीहरू अध्ययनरत रहेका छन् । पूर्णकालीन दक्ष शिक्षकले अध्यापन गराएर उत्कृष्ट नतिजा आत्मसात् गर्दै आएका कारण पनि कान्तिपुर विद्यार्थी र अभिभावकहरूको पहिलो रोजाइमा परेको छ ।
