विराटनगर । विराटनगर– ५ स्थित एभरेष्ट सेकेण्डरी स्कुलले आफ्ना विद्यार्थीको सर्वाङ्गीण विकासका लागि अभिभावकको भूमिका महत्वपूर्ण हुने मान्यताका साथ कार्यक्रम अघि बढाउँदै लगेको छ ।
विद्यालयले अपनाएका पद्धति, शैक्षिक वातावरणको विषयमा अभिभावकलाई जानकारी गराउँदै घरायसी वातावरण पनि सोहि अनुसारको तयार गर्न एभरेष्टले अभिभावकहरूसँग आग्रह गरेको छ । विद्यालय तथा अभिभावकले गरेको लगानीलाई सार्थक तुल्याउन हरेक बालबालिकाको सर्वाङ्गीण विकास कतिको भयो भन्ने कुराले निर्धारण गर्ने भन्दै एभरेष्टका प्रिन्सिपल टिकाराम पुरीले समयसँगै शैक्षिक वातावरण पनि गतिशिल रहेको बताए ।
आज कक्षा ७ र ८ का विद्यार्थीका अभिभावकका लागि आयोजित ‘काउन्सिलिङ’ कार्यक्रमलाई सम्बोधन गर्दै उनले विद्यालय स्थापनको ३२ वर्षीय यात्रामा एभरेष्टका विद्यार्थी विश्वसँग प्रतिष्पर्धा गर्न सक्ने भएको स्मरण गरे। उनले भने,‘यसका लागि अभिभावकको भूमिका पनि उत्तिकै छ, अझै समयको गतिसँगै हामीले गर्ने व्यवहार महत्वपूर्ण हुने भएकाले सोहि अनुसार अपडेट हुन कार्यक्रमले सहयोग गर्ने विश्वास ब्यक्त गरे।
कार्यक्रममा विद्यालयका भाइस प्रिन्सिपल कुन्दन पुरीले एभरेष्टले अपनाएका शिक्षण पद्धति, शैक्षिक वातावरण, काउन्सिलिङ विधि, विभिन्न संस्थाहरुसँगको सहकार्य, शैक्षिक गुणस्तरका लागि चालिएका कदम तथा सर्वाङ्गीण विकासका लागि गरिएका कार्यहरुको चर्चा गरे ।
कार्यक्रममा सहभागि अभिभावकहरुलाई उत्प्रेरक प्रितम पौडेलले प्रेरणादायी भनाइका साथै अभ्यास गराई घरको वातावरण कस्तो हुनुपर्छ भन्ने बुझाए। घरमा अभिभावकले खेल्ने भूमिका कस्तो हुँदा बालबालिकामा सकारात्मक उर्जा मिल्ने र सफल ब्यक्तित्व निर्माणमा सघाउ पुग्छ भन्ने उनले उदाहरणहरु दिए । सहभागि अभिभावकहरुले कार्यक्रम निकै नै फलदायी भएको प्रतिकृया दिएका छन् ।
स्कुलका अनुसार कक्षा ९ र १० का अभिभावकका लागि भोली कार्यक्रम राखिएको छ ।
