विराटनगर । विराटनगरको सत्यनारायण माविका विद्यार्थीहरूले Gen Z आन्दोलनका सहिदहरूलाई श्रद्धाञ्जली तथा दीप प्रज्ज्वलन कार्यक्रम आयोजना गरेका छन् ।
भदौ २३ र २४ गते देश परिवर्तनको निमित्त भएको जेनजी आन्दोलनमा आफ्नो अमूल्य जीवन बलिदान दिएका वीर-सहिदहरूको सम्झनामा मंगलबार विद्यार्थीहरूले एक श्रद्धाञ्जली तथा दीप प्रज्ज्वलन कार्यक्रमको आयोजना गरेका थिए ।
विद्यालय परिसर बाहिरमा आयोजित कार्यक्रममा सहभागी विद्यार्थीहरूले सहिदहरूप्रति सम्मान व्यक्त गर्दै दीप प्रज्वलन गरेका थिए ।
राष्ट्र र जनताका लागि ज्यान गुमाएका अमर सहिदहरूप्रति मौन धारण गरी सम्मान व्यक्त गरियो भने लगत्तै राष्ट्रिय गान गाएर सबैले देशप्रतिको आफ्नो प्रतिबद्धता दोहोर्याएका थिए ।
कार्यक्रमको मुख्य उद्देश्य नयाँ पुस्तालाई सहिदहरूको बलिदान र त्यागको महत्त्वबारे जानकारी गराउनु रहेको आयोजक विद्यार्थीहरूले बताए ।
कार्यक्रममा बोल्दै विद्यार्थीहरुले भने, “हामी जेनजी पुस्ताले अब केवल सामाजिक सञ्जालमा मात्र होइन, देशको यथार्थ परिवर्तनका लागि मैदानमा उत्रिनेछौं । हाम्रा सहिदहरूले देखाएको बाटो र उनीहरूको बलिदानलाई हामी खेर जान दिने छैनौं ।”
दीप प्रज्वलनसँगै विद्यार्थीहरूले नेपाल आमाका वीर सन्तानहरूले देखेको समृद्ध नेपालको सपना पूरा गर्ने प्रण गरेका छन् ।
यस कार्यक्रमले विद्यार्थीहरूमा राष्ट्रियता र देशप्रेमको भावना थप जागृत गराएको बताइएको छ ।
