विराटनगर । राजनीतिक सहमति जुटेसँगै प्रधानमन्त्री पदमा सुशीला कार्कीको नियुक्ति तथा शपथग्रहण आजै हुने भएको छ ।
राष्ट्रपतिका सल्लाहकार किरण पोखरेलका अनुसार उनको शपथ आज ९ बजे हुने भएको छ ।
राष्ट्रपति रामचन्द्र पौडेलले कार्कीलाई अन्तरिम सरकारको प्रधानमन्त्री पदमा नियुक्ति गर्नुका साथै आजै शपथ ग्रहणको कार्यक्रम राखिएको छ ।
नेपाली राजनीतिक इतिहासमा कार्की पहिलो महिला प्रधानमन्त्री हुन् । जेन जी आन्दोलनकारीको प्रतिनिधित्व गर्दै उनी सरकारको नेतृत्व गर्दै छिन् ।
यसरी भयो सहमति
जेन-जी अभियन्ताहरूले पहिले संसद् विघटन गरेर मात्रै अन्तरिम सरकार गठन प्रक्रिया थाल्नुपर्ने अडानमा राष्ट्रपति पौडेलले दिनभरजसो असहमति जनाएका थिए ।
तर, नेपाली सेनाले समेत जतिसक्दो चाँडो सहमति नजुटाए शान्तिसुरक्षा कायम गर्नकै लागि पनि संकटकाल लगाउनुपर्ने संकेत गरेपछि उनले छलफल तीव्र पारेका थिए ।
सहमति हुनुअघि अन्तिम क्षणसम्म संसदं विगठन नगरी अन्तरिम सरकार गठन गर्ने अडानबाट राष्ट्रपति पौडेल तब पछि हटे – जब प्रस्तावित प्रधानमन्त्री सुशीला कार्की, जेन-जी अभियन्ता र संवैधानिक निकायका केही पदाधिकारीहरूले संसद् विघटन गरेर मात्रै अन्तरिम सरकार गठन गर्नुपर्ने अडान राखे ।
त्यस्तो अडान र सुझाव आएपछि राष्ट्रपति पौडेल त्यसमा सहमत भएका हुन् । सहमतिअनुसार आजै कार्कीलाई अन्तरीम सरकारको प्रमुख बनाएर शपथ खुवाइने बताइएको छ ।
कार्कीलाई सपथ खुवाइएपछि मात्र उनले सानो आकारको मन्त्रीमण्डल गठन गर्ने जेनजी युवाको भनाइ छ ।
