काठमाडौँ । कीर्तिपुर वर्न अस्पतालमा उपचाररत नेकपा एसका नेता झलनाथ खनालकी पत्नी रविलक्ष्मी चित्रकारको स्वास्थ्य अवस्था चिन्ताजनक रहेको छ ।
कीर्तिपुर वर्न अस्पतालका प्रमुख डा. किरण नकर्मीले आगजनीमा घाइते भएकी चित्रकारको स्वास्थ्य अवस्था चिन्ताजनक रहेको जानकारी दिए । उनको अस्पतालको आइसियूमा राखिएको छ ।
मंगलबार हिंसात्मक प्रदर्शनका क्रममा आन्दोलनकारीले डल्लुस्थित झलनाथको घरमा आगो लगाउँदा समयमै बाहिर निस्किन नसक्दा उनी जलेकी थिइन् ।
आन्दोलनका क्रममा आगजनीमा घाइते भएर ३० जना वर्न अस्पतालमा गएको डा. नकर्मीले जानकारी दिए । घाइतेमध्ये पाँच जना अस्पतालमा उपचाररत छन् ।
उनी भन्छन्, ‘आन्दोलनका क्रममा आगोमा जलेर ३० जना घाइते आउनुभएको थियो । धेरै जना उपचारपछि डिस्चार्ज भइसक्नुभएको छ भने केहीको अवस्था गम्भीर छ । ’
