विराटनगर । जेएनजी समूहले इटहरी उपमहानगरपालिकाका उद्यमीहरूको सपना र परिश्रमलाई समेत खरानी बनाइदिएको छ ।
जेनजी पुस्ताको प्रदर्शनअन्तर्गत मंगलबार इटहरी उपमहानगरपालिकाको प्रशासनिक भवन जलाउने क्रममा ब्युटिपार्लर समेत जलाइएको हो ।
तोडफोडको लहरले निजी घरहरूलाई मात्र नभई मार्टिन मेकअप स्टुडियो एण्ड ट्रेनिङ एकेडेमीलाई समेत अछुतो राखेन ।
युवतीहरूको सीप, महिलाहरूको आत्मनिर्भरता र धेरै विद्यार्थीहरूको भविष्यलाई टेकेको यो तालिम केन्द्र एकैछिनको भीडको उन्मादमा भत्किएको छ ।
लाखौं मूल्य बराबरका कस्मेटिक्स ब्रान्ड, तालिमका उपकरण र विभिन्न महत्वपूर्ण कागजातहरू ध्वस्त भएका छन् ।
आगजनीसँगै पसिना–रगतले कमाएको सम्पत्ति खरानीमा परिणत भएको सञ्चालक सुशील स्वेच्छा र उर्बी श्रेष्ठले दुखेसो पोखे ।
आँसु सम्हाल्दै स्वेच्छा भन्छन्, “हामीले दिनरातको मेहनतले यो संस्थालाई निर्माण गरेका थियौं । यो केवल व्यवसाय मात्र थिएन, सयौं युवतीहरूको भविष्य बोकेको आशाको चौतारी थियो । तर एकै क्षणमा सबथोक ध्वस्त भयो । हाम्रो आवाज राज्यले सुन्नुपर्छ, पीडालाई सम्बोधन गर्नुपर्छ भन्ने चाहना मात्रै हो ।”
तोडफोड र आगोको धुवाँले इटहरीको आकाश मात्र होइन, त्यहाँको समाजको मन पनि धमिलो बनाएको उनको भनाइ छ ।
कोही प्रशिक्षार्थीहरू आँसु झार्दै चुपचाप खरानी चहार्छन्, कोही अभिभावकहरू छोराछोरीको भविष्यबारे चिन्तित छन् । यो घटना केवल सम्पत्तिको नोक्सानी होइन, श्रम, सपना र विश्वासको चिरा हो ।
