झुम्का कारागारमा भाइरल संक्रमणको आशंका

विराटनगर । सुनसरीको रामधुनी नगरपालिकास्थित झुम्का कारागारमा भाइरल संक्रमणको आशंका गरिएको छ ।

एकैपटक ठुलो संख्यामा कैदीबन्दी बिरामी भएपछि भाइरल संक्रमणको आशंका गरिएको हो ।

कारागारभित्रका कैदीबन्दीहरूलाई ज्वरो आउने, जिउ दुख्ने, नाक बन्द हुने र श्वासप्रश्वासमा समस्या हुने समस्या देखिएपछि स्वास्थ्य संस्थान र प्रशासन सतर्क बनेका छन् ।

कैदीहरू एक्कासि बिरामी परेको जानकारी पाएपछि सुनसरीका प्रमुख जिल्ला अधिकारी धर्मेन्द्रकुमार मिश्र र प्रहरी प्रमुख एसपी सुमनकुमार तिम्सिनाले बुधबार साँझ धरानस्थित बीपी कोइराला स्वास्थ्य विज्ञान प्रतिष्ठानलाई गराएका थिए ।

प्रतिष्ठानका उपकुलपति प्रा.डा. विक्रमप्रसाद श्रेष्ठ र अस्पताल निर्देशक डा. जगतनारायण प्रसादले यसको जानकारी पाउनसाथ प्रतिष्ठानले तत्काल आपतकालीन स्वास्थ्य टोली खटाएको थियो ।

अस्पतालका निर्देशकको अध्यक्षतामा विभागीय प्रमुखहरूसहितको समन्वयमा ९ जनाको द्रुत प्रतिक्रिया टोली (आरआरटी) गठन गरी झुम्का कारागार पठाइयो ।

टोलीमा मेडिसिन, इमर्जेन्सी, जेनेरल प्राक्टिस र एनेस्थेसियोलोजी विभागका चिकित्सक, स्टाफ नर्स र ल्याब प्राविधिक सहभागी थिए । टोलीले कारागारमा पुगेपछि महामारीको सम्भावनालाई ध्यानमा राख्दै सावधानीका साथ स्थलगत परीक्षण र उपचार सुरु गरेको थियो ।

प्रतिष्ठानका अनुसार सुरुमा कारागारमा करिब १ हजार ८ सय कैदीबन्दी रहेको र तीमध्ये करिब ४ सय जना प्रभावित हुन सक्ने अनुमान गरिएको थियो । करिब १ सय जनामा ज्वरो र केहीलाई श्वासप्रश्वासमा समस्या देखिएको थियो । सुरुमा कैदीहरूको रक्तचाप, पल्स, तापक्रम र अक्सिजनको मात्रा जाँच गरियो ।

जाँचपछि अवस्था गम्भीर देखिएका कैदीबन्दीलाई अन्य ब्लकमा पठाएर थप उपचार गराइएको थियो । त्यस क्रममा ३५ जनामा डेंगुको परीक्षण गर्दा २ जनामा संक्रमण पुष्टि भएको प्रतिष्ठानका सह–प्रवक्ता अभिजीत कुमारले बताए ।

उनका अनुसार १० जनामा कोभिड–१९ (कोरोना भाइरस संक्रमण) परीक्षण गर्दा सबै जनाको रिपोर्ट नेगेटिभ आयो । यसले कारागारमा कोरोना संक्रमण नफैलिएको पुष्टि भएको छ ।

प्रारम्भिक परीक्षणपछि राति नै ५ जना कैदीबन्दीलाई उपचारका लागि प्रतिष्ठानको आकस्मिक कक्षमा भर्ना गरिएको थियो । तीमध्ये १ जनालाई नाकबाट रगत बग्ने, २ जनामा उच्च रक्तचाप, १ जनामा न्यून रक्तचापको समस्या रहेको र सबै जनाको अवस्था अहिले सामान्य भइसकेको प्रतिष्ठानले जनाएको छ ।

कारागारबाट बिहीबार पनि ५ जनालाई थप उपाचारका लागि प्रतिष्ठान भर्ना गरिएको छ । प्रतिष्ठानमा बिहीबार नै आरआरटी, डीसास्टर टिम र विभागीय प्रमुखहरूको संयुक्त बैठक बसेर यस विषयमा विस्तृत छलफल भएको थियो । करिब १०–१२ दिनयता कारागारबाट उपचारका लागि लगातार बिरामी आउने क्रम रहेकाले समस्या पुरानो देखिएको निष्कर्ष छलफलमा निस्किएको सह–प्रवक्ता कुमारले बताए ।

यस्तै लक्षण देखिएका ३ जना कैदीको पछिल्लो १ साताको अवधिमा मृत्यु भइसकेको प्रतिष्ठानले जनाएको छ । १ जनाको कारागारमै, १ जनाको इनरुवा अस्पताल र १ जनाको प्रतिष्ठानमा मृत्यु भएको जानकारी कुमारले दिए ।

उनका अनुसार प्रतिष्ठानमा मृत्यु भएकालाई सेप्टिक शक र मल्टिपल अर्गन डिसफंक्सन देखिएको थियो । आईसीयूमा राखेर उपचार सुरु गर्दै डायलाइसिस गर्दा पनि ज्यान बचाउन नसकिएको उनले बताए । त्यस्तै, करिब २ साताअघि सोही कारागारका १ कैदीलाई जापानीज इन्सेफलाइटिस लागेपछि आईसीयूमा भर्ना भएर उपचारपछि फर्किएका थिए ।

प्रतिष्ठानको मेडिसिन विभागका प्रमुख प्रा.डा. रविन मास्केले पछिल्लो १ महिनादेखि संस्थानमा भाइरल इन्फेक्सनका बिरामी बढेको र कारागारमा पनि भाइरलकै संक्रमण फैलिएको हुनसक्ने बताए । इमर्जेन्सी मेडिसिन र जेनेरल प्राक्टिस विभागका प्रमुख प्रा.डा. रविन भण्डारीले पनि कारागारमा अन्य रोगको संक्रमण फैलिएको पुष्टि हुन नसकेको बताए ।

प्रतिष्ठानले कारागारमा अहिले कुनै समस्या आइहाल्ने अवस्था नरहेको भए पनि सतर्कता भने अपनाउनुपर्नेमा जोड दिएको छ । कारागारमा देखिएको समस्याको समाधानमा प्रतिष्ठानले प्रशंसनीय भूमिका खेलेको र भविष्यमा सम्भावित ठूलो संक्रमणको अवस्थालाई ध्यानमा राखेर पूर्वतयारी आवश्यक रहेको निष्कर्ष निकालिएको सह–प्रवक्ता कुमारको भनाइ छ ।

विश्व स्वास्थ्य संगठनको डिसास्टर टिमले पनि कारागार र प्रतिष्ठानमा भर्ना भएका बिरामीहरूको नमुना संकलन गरेर थप परीक्षण गर्ने तयारी गरेको छ । हाल कारागारमा भाइरल संक्रमणकै कारण ३ सय जनाभन्दा बढी कैदीबन्दीहरु बिरामी परेको प्रतिष्ठानले जनाएको छ । कारागार प्रशासनका अनुसार बिरामीको बीपी प्रतिष्ठान र जिल्ला अस्पताल इनरुवामा उपचार भइरहेको छ ।