विराटनगर । काम खोज्नेलाई काम र सेवा खोज्नेलाई सेवा उपलब्ध गराउने पहिलो नेपाली फ्रिलाइन्स प्लेटफर्म ‘यहाँ छ डटकम’ सार्वजनिक गरिएको छ ।
झापाको बिर्तामोडस्थित किंङसवेरी सोमबार एक भव्य समारोहबीच व्यवसायिक अनलाइन पोर्टल ‘यहाँ छ’ सार्वजनिक गरिएको हो ।
बिर्तामोड नगर प्रमुख पवित्रादेवी महतारा प्रसाईले रुटडेभ्स सफ्टवेयर डेभलपमेन्ट प्रालिले निर्माण गरेको व्यवसायिक अनलाइन पोर्टल सार्वजनिक गरिन् ।
प्रविधिको क्षेत्रमा रोजगारी सिर्जना गर्ने र सो क्षेत्रबाट सेवा लिन अब उक्त पोर्टल सुरु गरिएको हो ।
प्रविधिसँग सम्बन्धित कुनै पनि सेवाका लागि काम गर्नु परे वा गराउनु परेमा यो प्लेटफर्मको प्रयोग गर्न सकिने कम्पनीका रविन थापाले जानकारी दिए ।
उनका अनुसार ल्यापटप र इन्टरनेट हुने जो कोहिले कुनै पनि ठाउँमा बसेर काम गर्न सकिने बताए ।
स्वदेशमा रोजगार छैन भन्नेहरूलाई उनले प्रविधिको ज्ञान भए विदेश जानु नपर्ने अवगत गराए ।
सन् २०१६ देखि अन्तर्राष्ट्रियस्तरमा सेवा गर्दै आएको कम्पनीले नेपालभरका लागि नयाँ कार्यक्रम ल्याएको हो ।
अनलाइन सेवामार्फत गरिने काममा भुक्तानी खल्तीबाट गर्ने व्यवस्था मिलाइएको छ ।
रोजगार र सीपलाई जोड्ने माध्यमका रूपमा सार्वजनिक गरिएको ‘यहाँ छ’ ले दुवै पक्षका समस्याहरू समाधान गर्ने विश्वास गरिएको छ ।
कार्यक्रमको प्रमुख अतिथि नगर प्रमुख प्रसाईले युवाहरूले नेपालमै सम्भावना देखाउन गरेको प्रयासको प्रशंसा गरे ।
केही हुँदैन भन्नेहरूका लागि यो कामले बलियो उदाहरण पेश गरेको उनको भनाइ थियो । प्रविधिको युगमा अति आवश्यक अनलाइन व्यवसायिक पोर्टल निर्माण गरेकामा धन्यवाद समेत दिए ।
सो अवसरमा उक्त कार्यक्रम निर्माणका लागि आवश्यक सहयोग गर्ने युवा व्यवसायी पदम श्रेष्ठलाई सम्मान समेत गरिएको थियो ।
सल्लाहकार रविन चापागाईको अध्यक्षतामा भएको कार्यक्रममा नेकपा एमाले बिर्तामोडका अध्यक्ष सुवास भट्टराई, बिर्तामोड उधोग वाणिज्य संघका अध्यक्ष राजु न्यौपाने, नेपाल पत्रकार महासंघ झापाका उपाध्यक्ष सुब्रत न्यौपानेलगायतले शुभकामना मन्तव्य राखेका थिए ।
पत्रकार रमेश तिवारीले सञ्चालन गरेको कार्यक्रममा कम्पनीका नविन भण्डारीले स्वागत गरे ।
