विराटनगर । उदयपुरको बेलका नगरपालिका–२, कञ्चनजंघा टोलस्थित हिमशिखर इङ्लिस बोर्डिङ स्कुलका प्रधानाध्यापक युवराज श्रेष्ठ पक्राउ परेका छन् ।
आफ्नै विद्यालयकी १४ वर्षीय छात्रामाथि जबरजस्ती करणी गरेको गम्भीर आरोपमा ४७ वर्षीय श्रेष्ठलाई रामपुर प्रहरीले पक्राउ गरेको हो ।
बालिकालाई शनिबार बलात्कार गरेको आरोपमा प्रहरीले बेलका नगरपालिका-२ का श्रेष्ठलाई आइतबार पक्राउ गरेको थियो ।
भदौ १४ गते कक्षाकोठामा बलात्कार गरेको भन्दै आरोपितविरुद्ध पीडित पक्षले आइतबार इलाका प्रहरी कार्यालय, रामपुर ठोक्सिलामा उजुरी दिएको थियो ।
पीडित पक्षको उजुरीका आधारमा आरोपितलाई अनुसन्धानका लागि पक्राउ गरिएको प्रहरीले जनाएको छ ।
प्रहरीका अनुसार प्रारम्भिक अनुसन्धानका क्रममा आरोपित शिक्षक हिमशिखर सामुदायिक इंग्लिस स्कूलका प्रिन्सिपल भएको खुलेको हो।
पीडित बालिकाको स्वास्थ्य परीक्षण आइतबार नै जिल्ला अस्पतालमा गरिएको छ ।
