विराटनगर। विराटनगरमा सम्पन्न अन्तर कलेज वक्तृत्वकला प्रतियोगितामा इटहरीस्थित सुष्मा गोदावारी कलेजकी छात्रा श्रेयासी भट्टराई प्रथम बनेकी छन् ।
सडक दुर्घटनामा परी मृत्यु भएका लियो क्लब अफ विराटनगर योङ हर्टका पूर्वअध्यक्ष पुष्पकुमार चौधरी (पुष्पे थारू) को स्मृतिमा शुक्रबार आयोजित प्रतियोगितामा प्रथम बनेकी उनले १० हजार रुपैयाँ नगद जितेकी थिइन् ।
साथै, श्रेयासीलाई मेडल, ट्रफी, प्रमाणपत्र, १ वर्षको लाइफ इन्स्योरेन्स, ३ महिनाको जिम सब्सक्रिप्सन निःशुल्क र ३/४ वटा क्याफेबाट फुड कुपन प्रदान गरिएको थियो ।
यसैगरी, प्रतियोगितामा दोस्रो हुँदै सुकुना बहुमुखी क्याम्पसका कुसुम नेपालले नगद रु ५ हजार, मेडल, ट्रफी, प्रमाणपत्र र फुड कुपन पाउँदा तेस्रो भएकी सत्यनारायण स्कुलकी भैरवी निरौलाले रु ३ हजार, ट्रफी, मेडल, प्रमाणपत्र र फुड कुपन पाएकी थिइन् ।
विराटनगरको ग्रिनल्यान्ड कलेजकी गनिका यादवलाई चौथो हुँदै रु १५ सय रुपैयाँ नगद र प्रमाणपत्र प्रदान गरिएको थियो भने सबै प्रतियोगीहरूलाई प्रमाणपत्र र अतिथिहरूलाई टोकन अफ लभ प्रदान गरिएको थियो ।
लियो क्लब अफ विराटनगर योङ हर्टको आयोजनामा भएको प्रतियोगितामा १७ वटा शैक्षिक संस्थाबाट कुल २७ जना प्रतिभागीले सहभागिता जनाएका थिए ।
प्रतियोगितामा आदर्श सेकेन्डरी स्कुल, सत्यनारायण सेकेन्डरी स्कुल, शिक्षादीप बोर्डिङ सेकेन्डरी स्कुल, एभरेस्ट सेकेन्डरी स्कुल, मेरिल्यान्ड कलेज, कान्तिपुर कलेज, ग्रिनल्यान्ड इन्टरनेसनल सेकेन्डरी स्कुल, सिद्धार्थ कलेज, अर्किड कलेज, सुष्मा गोदावारी कलेज, इटहरी नमुना कलेज, बिएसएन स्कुल अफ होटल म्यानजमेन्ट, सुकुना बहुमुखी क्याम्पस र सगरमाथा सेकेन्डरी बोर्डिङ स्कुलले सहभागिता जनाएका थिए ।
करिब २५० दर्शकको उपस्थितिमा सम्पन्न कार्यक्रममा ‘महँगी, बेरोजगारी र युवाको भविष्य’ शीर्षकमा वक्तृत्व प्रतियोगिता भएको थियो ।
कार्यक्रमको मुख्य अतिथिमा लायन ईन्द्र खत्री (राजन) रहेका थिए भने विशेष अतिथिमा प्रमुख जिल्ला अधिकारी ईन्द्रदेव यादव र लायन्स क्लब अफ विराटनगर योङ हर्टका द्वितीय उपाध्यक्ष पंकजकुमार बहेतीको उपस्थिति रहेको थियो ।
प्रतियोगिताको न्यायाधीशमा डा. सन्देशदास श्रेष्ठ, डा. दिल्ली प्रसाई र बीएफएम ९१.२ की प्रबन्ध निर्देशक निशा खुसी रहेका थिए ।
लियो क्लब अफ विराटनगर योङ हर्टका सभापति कुशल कोइरालाको नेतृत्वमा आयोजित कार्यक्रममा प्रथम उपाध्यक्ष प्रश्रित ढकाल, कोषाध्यक्ष विकाश दाहाल र कार्यक्रम संयोजक प्रथम ओझाको सक्रियता रहेको थियो ।
कार्यक्रममा विभिन्न लायन्स र लियो क्लबका पूर्व अध्यक्षहरू, जिल्ला अध्यक्षहरू र पदाधिकारीहरूको उपस्थिति रहेको थियो । प्रतियोगिताको मुख्य प्रायोजक जिनियस ग्रुप इन्टरनेसनल एजुकेसन प्रा.लि. रहेको थियो ।
