विराटनगर । मोरङको रतुवामाईमा ग्यास सिलिन्डर पड्किएर भएको आगलागीमा तीन पसलमा क्षति पुगेको छ ।
रतुवामाई-६ सौँठा चोकमा सोमबार बिहान ग्यास सिलिन्डर पड्किँएर आगलागी भएको थियो । जसकारण तीनवटा पसलमा पूर्ण रूपमा क्षति पुगेको छ ।
प्रहरीका अनुसार बिहान करिब ६ बजेतिर खाना पकाउने क्रममा ग्यास सिलिन्डर पड्किएर आगो लागेको हो । सिलिन्डर पड्किनासाथ आगलागी सुरु भएको थियो ।
आगोले टीका खनालले सञ्चालन गर्दै आएको चिया पसल, सूर्यमान श्रेष्ठको चस्मा पसल र किराना पसलमा क्षति पुगेको मोरङ प्रहरी प्रवक्ता डिएसपी कोपिला चुँडालले जानकारी दिइन् ।
यी सबै पसल टेकमान लिम्बूको जग्गा भाडामा लिएर सञ्चालन भइरहेका थिए ।
प्रहरीको प्रारम्भिक अनुमान अनुसार आगलागीबाट करिब आठ लाख रुपैयाँ बराबरको क्षति भएको छ ।
स्थानीयबासी, नेपाल प्रहरी, सशस्त्र प्रहरी र दमकलको संयुक्त प्रयासमा करिब १ घण्टापछि मात्र आगो नियन्त्रणमा लिइएको थियो ।
