विराटनगर । मोरङको रंगेली नगरपालिका कृष्ण मुर्मुलाई पाँचथर प्रहरीले चितवनबाट पक्राउ गरेको छ ।
२० लाख रुपैयाँ ठगी गरेको अभियोगमा रंगेली नगरपालिका-४ घर भई चितवनको भरतपुर महानगरपालिका ४ त्रिचोकमा बसोबास गर्दै आएका अमित महतो भन्ने कृष्ण मुर्मुलाई प्रहरीले पक्राउ गरेको हो ।
जिल्ला प्रहरी कार्यालय पाँचथरका अनुसार मुर्मुले नवलपरासी घर भएका जोगबहादुर थारू र बच्चु गुरुङलाई ठगेका थिए ।
उनीहरूसँगको मिलेमतोमा साझेदारीमा जग्गा कारोबार, डलर कारोबार र व्यापार व्यवसाय गरी धेरै पैसा कमाउने प्रलोभनमा देखाई उनले पाँचथरको फाल्गुनन्द–२ का चक्रराज रम्तेलबाट २० लाख रुपैयाँ ठगी गरेको प्रहरीले जनाएको छ ।
पीडितहरूको उजुरीका आधारमा उनलाई पक्राउ गरिएको पाँचथर प्रहरीका प्रवक्ता एवम् प्रहरी निरीक्षक रुपेश तामाङले जानकारी दिए ।
तामाङका अनुसार मुर्मुलाई चितवन प्रहरीसँगको सहकार्यमा पक्राउ गरी पाँचथर ल्याइएको पनि तामाङको भनाइ छ ।
अन्य आरोपीको खोजी कार्य जारी रहनुका साथै मुर्मुलाई अदालत हाजिर गराउने तयारी भइरहेको प्रहरीले जनाएको छ । हाल मुर्मुलाई जिल्ला प्रहरी कार्यालय पाँचथरको हिरासतमा राखी अनुसन्धान सुरु गरिएको छ ।
