सप्तरी । सप्तरीमा जेठानी–देवरानीबिच कुटपिट हुँदा पाँच महिनाको गर्भ खेर गएको छ ।
सप्तरीको खडक नगरपालिका–७ स्थित कल्याणपुरमा बाटोमा इँटा राख्ने विवादले दुई महिलाबिच झगडा र कुटपिट हुँदा एक महिलाको पाँच महिनाको गर्भ खेर गएको हो ।
भदौ ४ गते बिहीबार बिहान १० बजे ४० वर्षीया जिबछी देवी साह र उहाँका देवरानी ३५ वर्षीया ललिता देवी साहबिच बाटोमा इँटा राख्ने विषयलाई लिएर झगडा भएको थियो ।
झगडा बढ्दै जाँदा कुटपिटसम्म पुगेको र सो क्रममा गर्भवती रहेको ललिताको पेटमा चोट लागेर उहाँको गर्भ खेर गएको हो ।
कुटपिटबाट ललिता साहको पेटमा चोट लागि घाइते भएको र तत्काल अवस्था सामान्य रहेकाले घरमा नै बसेको तर एक्कासि पेट दुःखी बिरमी भएर उपचारका लागि राजविराजस्थित गजेन्द्रनारायण सिंह अस्पताल ल्याइएकोमा आइतबार पाँच महिनाको गर्भ खेर गएको हो ।
जिल्ला प्रहरी कार्यालय सप्तरीका प्रहरी नायब उपरीक्षक जितेन्द्र कुमार बस्नेतका अनुसार उपचारका क्रममा चिकित्सकले उनको गर्भपतन भएको पुष्टि गरेका हुन् ।
कुटपिटका आरोपी जिबछी देवी साह फरार रहेको र उनको खोजतलास जारी रहेको र घटनाबारे जानकारी पाएपछि इलाका प्रहरी कार्यालय कल्याणपुरबाट खटिएको प्रहरी टोलीले थप अनुसन्धान गरिरहेको जिल्ला प्रहरी कार्यालय सप्तरीले जनाएको छ ।
