विराटनगर । कोशी प्रदेशमा अग्रणी शैक्षिक संस्थाका रूपमा कहलिएको ग्रिनल्यान्ड कलेजले आफ्ना विद्यार्थीहरूलाई साइबर सुरक्षासम्बन्धी प्रशिक्षण प्रदान गरेको छ ।
विराटनगर-९ मा अवस्थित कलेजले शुक्रबार साइबर अपराध नियन्त्रण र सचेतना अभिवृद्धि गर्ने अभिप्रायका साथ कक्षा १२ का विद्यार्थीहरूलाई विशेष प्रशिक्षण दिएको हो ।
विराटनगरको रुविज होटलको सभाहलमा आयोजित साइबर अपराध नियन्त्रण प्रशिक्षण कार्यक्रममा विद्यार्थीहरूलाई सामाजिक सञ्जाल, इमेल, अनलाइन कारोबारलगायत इन्टरनेट प्रयोगका क्रममा अपनाउनुपर्ने सावधानीबारे विस्तृत जानकारी दिइएको कलेजका प्रिन्सिपल दिनेश दाहालले जानकारी दिए ।
विद्यार्थीहरूलाई समुदायमा प्रहरी साँझेदारी कार्यक्रमअन्तर्गत वडा प्रहरी कार्यालय विराटनगरका प्रहरी निरीक्षक अप्रिल चापागाइले साइबर अपराध नियन्त्रण र सचेतना अभिवृद्धिबारे प्रशिक्षण दिएका थिए ।
उनले पछिल्ला दिनमा साइबर अपराध तीव्र रूपमा बढ्दै गएको भन्दै विद्यार्थीहरूलाई सचेत भएर इन्टरनेट प्रयोग गर्न सुझाए ।
इन्टरनेटको सदुपयोग नगरेसम्म अपराध रोक्न नसकिने उनले उल्लेख गरे ।
कार्यक्रममा व्यक्तिगत पासवर्ड सुरक्षा, डिजिटल डाटा संरक्षण, ठगीबाट जोगिने उपाय र अनलाइनमा हुने असुरक्षित गतिविधिबाट बच्ने तरिकाबारे व्यावहारिक सिप प्रदान गरिएको थियो ।
प्रिन्सिपल दिनेश दाहालले विद्यार्थीहरूलाई प्राप्त भएको प्रशिक्षणले भविष्यमा उनीहरूलाई सुरक्षित डिजिटल नागरिक बन्न मद्दत गर्ने विश्वास व्यक्त गरे ।
उनले विद्यार्थीहरूलाई पढाइका अतिरिक्त जीवन उपयोगी शिक्षा प्रदान गर्नु अहिलेको आश्यक रहेको बताए ।
कार्यक्रममा कलेजका अध्यक्ष रविन्द्र घिमिरे, संचालक रोशन मेहता, शिव रतन साह लगायत दुई सय बढी विद्यार्थीहरूको सहभागिता रहेको थियो ।
कलेजले पछिल्लो एक दशकयता गुणस्तरीय शिक्षा प्रदान गर्दै आएको छ ।
कम्प्युटर विज्ञान, व्यवस्थापन संकाय र होटेल व्यवस्थापन संकाय गरी तीनवटै मुख्य संकायहरूमा गुणस्तरीय शिक्षा प्रदान गर्दै आएको छ ।
