अमेरिकी राष्ट्रपति डोनाल्ड ट्रम्पले अमेरिकी हवाई सहयोग र युरोपेली स्थल सेना युक्रेनको सुरक्षा प्रत्याभूतिको हिस्सा हुन सक्ने बताएका छन्।
युरोपेली नेतासँगको भेटपछि ट्रम्पले यस्तो बताएका हुन् । राष्ट्रपति ट्रम्पले फक्स न्यूजसँग भनेका छन्, “सुरक्षाको कुरामा उनीहरू यूरोपेली स्थल सेनालाई युक्रेनमा राख्न तयार हुन्छन्।” ट्रम्पले मस्को र किएभबीचको वार्ता असफल भएमा ‘कठिन’ स्थिति उत्पन्न हुने चेतावनी दिँदै यस्तो आश्वासन दिएका हुन् ।
उनले अमेरिका हवाई माध्यमबाट सहयोग गर्न इच्छुक भएको प्रष्ट पारे। उनले थप भनेका छन्, “हामी उनीहरूलाई विशेष गरी हवाई माध्यमबाट मद्दत गर्न इच्छुक छौं, हामीसँग भएको हातहतियार कसैसँग पनि छैन, वास्तवमा, उनीहरूसँग छैन।”
उनले युक्रेनलाई पश्चिमी सैन्य गठबन्धन नेटोमा सामेल गराउने कुरा भने अस्वीकारगरेका छन्।
रुसी आक्रमणको तीन वर्षभन्दा बढी समय बितिसक्दा पनि युद्धपछिको सुरक्षा किएभका लागि प्रमुख चिन्ताको विषय बनेको छ । मस्कोले लामो समयदेखि युक्रेनलाई नेटोमा सामेल भएको सहन नगर्ने बताउँदै आएको छ । उसले पूर्व सोभियत क्षेत्रमा पश्चिमी सेना तैनाथ गर्ने विचारको विरोध गर्दै आएको छ।
