दुहबी । ब्रह्मकुमारी राजयोग केन्द्र, दुहबीद्वारा आयोजित विशेष “जनप्रतिनिधि तथा कर्मचारीहरूलाई खुसी जीवन” विषयक प्रवचन तथा ध्यान कार्यक्रम आज एक भव्य समारोहका बीच सम्पन्न भएको छ ।
कार्यक्रमको उद्घाटन दुहबी नगरपालिकाका नगर प्रमुख वेद नारायण गच्छेदारले दीप प्रज्वलन गरी गर्नुभएको थियो ।
उद्घाटन अवसरमा बोल्दै नगर प्रमुख गच्छेदारले राज्य सञ्चालन, जनप्रतिनिधि र कर्मचारीहरूको जिम्मेवारी अत्यन्तै संवेदनशील र चुनौतीपूर्ण हुने भएकाले मानसिक शान्ति, आत्मिक बल र सकारात्मक सोचको आवश्यकता बढ्दै गएको बताए । उहाँले ब्रह्मकुमारी संस्थाले आयोजना गर्ने ध्यान र प्रवचन कार्यक्रमहरू समाजलाई नैतिक मूल्य, आध्यात्मिक चेतना र सन्तुलित जीवनतर्फ प्रेरित गर्ने विश्वास व्यक्त गर्नुभयो ।
कार्यक्रममा ब्रह्मकुमारी राजयोग केन्द्रका प्रशिक्षक तथा अध्यात्मिक प्रवचनकर्ताहरूले “खुसी जीवनका आधारहरू”, “तनावमुक्त कार्य–संस्कृति”, “आत्मज्ञान र सकारात्मक सोचको शक्ति” लगायतका विषयमा गहन प्रस्तुति दिनुभयो । सहभागीहरूलाई दैनिक जीवनमा ध्यान र राजयोग अभ्यासमार्फत शारीरिक, मानसिक र आत्मिक सन्तुलन कसरी कायम राख्ने भन्ने बारेमा व्यवहारिक अभ्याससमेत गराइएको थियो ।
साथै, वक्ताहरूले राजयोग ध्यानलाई केवल धार्मिक अभ्यास नभई, जीवनशैली सुधार गर्ने एक वैज्ञानिक विधि रहेको बताउँदै, नियमित ध्यानले तनाव नियन्त्रण, कार्यक्षमता वृद्धी र सामाजिक सद्भाव कायम गर्न सकिनेमा जोड दिनुभयो ।
कार्यक्रममा दुहबी नगरपालिकाका उप–प्रमुख, विभिन्न वडाध्यक्ष, नगर कार्यपालिकाका सदस्यहरू, प्रशासनिक कर्मचारी, स्थानीय विद्यालयका शिक्षक, स्वास्थ्यकर्मी, व्यवसायी तथा समाजसेवीहरूको समेत उल्लेखनीय उपस्थिति रहेको थियो । सहभागीहरूले यस्ता कार्यक्रमहरूले आफ्ना व्यक्तिगत र पेशागत दायित्वलाई सहज बनाउन ठूलो सहयोग पुग्ने धारणा राखे ।
