बलिउड अभिनेत्री मलाइका अरोराले आफ्नो व्यक्तिगत जीवनबारे खुलेर अभिव्यक्ति दिएकी छन्। हालै पिङ्कभिला सँगको विशेष अन्तर्वार्तामा अभिनेत्री मलाइकाले पूर्वपति अरबाज खानसँगको असफल विवाह, प्रेमप्रतिको दृष्टिकोण र सह-पालनपोषणका अनुभव साटेकी हुन्। उनीहरूका एक छोरा अरहान छन्, जसको सह-पालनपोषण दुवै जना अभिभावकले गरिरहेका छन्।
अभिनेत्री मलाइका र अरबाज सन् २०१६ मा आधिकारिक रूपमा अलग भएका थिए। “म चाहन्थें मेरो विवाह जीवनभर रहोस्, तर त्यस्तो भएन,” उनले भनिन्, “तर यसको अर्थ मैले प्रेममाथि विश्वास गुमाएँ भन्ने होइन। जे हुनुपर्ने थियो, त्यही भयो।”
उनका अनुसार, विवाह जोगाउन धेरै प्रयास भए पनि अन्ततः दुवैले अलग हुने निर्णय गरेका थिए। उनले भनिन्, “एक समय यस्तो आयो, जहाँ हामीले निर्णय गर्यौं – यो सम्बन्ध अब चल्नेवाला छैन।”
आफूलाई प्राथमिकता दिने निर्णय
मलाइकाले आफ्ना निर्णयलाई लिएर धेरै आलोचना खेप्नुपरेको स्मरण गरिन्। उनले भनिन्, “मान्छे भन्छन्, तपाईंले बच्चा र परिवारलाई प्राथमिकतामा राख्नुपर्छ। तर आफूलाई प्राथमिकतामा राख्नु के गल्ती छ? जबसम्म म खुसी छैन, मैले अरुलाई कसरी खुसी बनाउन सक्थें?”
उनले थपिन्, “धेरैलाई मेरो निर्णय ‘स्वार्थी’ लाग्यो। तर यही निर्णयले मलाई अझ शान्त र खुसी बनाएको छ। मेरो छोरा पनि अहिले धेरै राम्रो र खुसी स्थानमा छ।”
अरबाज खानसँग अलग भए पनि छोराको लागि दुवै जना अभिभावक बनेर उभिएको मलाइकाले सह-पालनपोषणबारे पनि अनुभव सुनाइन्। पूर्वपति अरबाज खानसँगको सम्बन्ध टुटे पनि अभिनेत्री मलाइकाले प्रेमप्रतिको विश्वास गुमाएकी छैनन्। उनले आफूलाई प्राथमिकता दिने निर्णयले जीवनलाई सकारात्मक मोड दिएको बताउँदै अहिले आफू र परिवार दुवै खुसी र सहज अवस्थामा रहेको जनाइन्। साथै जति पनि विवाह विच्छेद भोगेका सबै महिला दिदीबहिनीलाई पनि आफ्नो जीवन आफ्नो हिसाबले जिउन र आफूलाई सधैँ प्राथमिकतामा राखेर जीवन जिउन आग्रह गरिन्।
