विराटनगर । सुनसरीको रामधुनी नगरपालिकास्थति झुम्का कारागारको १८ फिट अग्लो पर्खाल नाघेर एक जना कैदी फरार बनेपछि छानबिन समिति गठन गरिएको छ ।
सामूहिक बलात्कार मुद्दामा सजाय भोगिरहेका खोटाङको दिप्रुङ चुइचुम्मा गाउँपालिका– २ घर भएका २८ वर्षीय रूपक पौडेल खत्री बुधबार बिहान फरार भएका थिए ।
जेलर सुवासकुमार लामिछानेका अनुसार उनी बुधबार बिहान करिब २ बजे कारागारको बी ब्लकबाट १८ फिट अग्लो पर्खाल नाघेर फरार भएका हुन् ।
मुढा बुन्ने बाँसहरूको सहयोगमा अप्रत्याशित रूपबाटै कैदी भागेको र वर्षा भइरहेकाले उनी भागेको थाहा हुन नसकेको लामिछानेले बताए ।
जिल्ला अदालत सुनसरीले गत २५ चैतमा खत्रीलाई १३ वर्ष कैद सजायको फैसला गरेको थियो । त्यसअघि उनी २१ साउन ०८१ बाट पुर्पक्षका लागि कारागारमा थिए ।
उनी त्री फरार भएपछि जिल्ला प्रशासन कार्यालय सुनसरीका सहायक प्रमुख जिल्ला अधिकारी लोकमान श्रेष्ठको संयोजकत्वमा पाँच सदस्यीय छानबिन समिति गठन गरिएको छ ।
समितिमा प्रहरी निकाय, राष्ट्रिय अनुसन्धान विभाग, कारागारलगायत क्षेत्रका प्रतिनिधिलाई सदस्यका रूपमा राखिएको छ ।
समितिले कारागारको वस्तुस्थितिको अध्ययन गर्ने र कैदी फरार भएको सन्दर्भसमेत समेटेर प्रतिवेदन तयार पार्ने प्रमुख जिल्ला अधिकारी धर्मेन्द्रकुमार मिश्रले बताए ।
यसअघि २३ कात्तिक ०६९ मा पनि झुम्का कारागारबाट सुरुङ खनेर १२ जना कैदी फरार भएका थिए । जसमध्ये एकजनालाई जिल्ला प्रहरी कार्यालय सुनसरीले पक्राउ गरेर गत २४ कात्तिक ०८१ मा सार्वजनिक गरेको थियो ।
११ जना अझै फरार छन् । एक हजार ६ सय कैदीबन्दी क्षमता रहेको झुम्का कारागारमा हाल एक हजार ७९५ छन् ।
