विराटनगर । सुनसरीको दुहबी नगरपालिकामा निर्माणाधीन घरको ‘सेफ्टी ट्यांकी’भित्र दुई जना मृत फेला परेका छन् ।
दुहबी-४ शिव मन्दिर चोकमा चन्द्रिका रौनियारको नयाँ बन्दै गरेको घरको ‘सेफ्टी ट्यांकी’भित्र ठेकेदार र कामदारको शव फेला परेको हो ।
सुनसरी प्रहरीका प्रवक्ता प्रहरी नायब उपरीक्षक योगराज खतिवडाका अनुसार बुधबार बिहान १० बजेतिर दुहबी–२ का अन्दाजी ५० वर्षीय श्यामबहादुर तामाङ र ३२ वर्षीय रमेश राईको शव ‘सेफ्टी ट्यांकी’ भित्र फेला परेको हो ।
तामाङले घर निर्माणको पेटी ठेक्का लिएका थिए भने राई कामदार रहेको डिएसपी खतिवडाले जानकारी दिए ।
घटनास्थल इलाका प्रहरी कार्यालय दुहबीबाट करिब २ किलोमिटर पूर्वमा पर्छ । प्रहरीले मृत्युको कारण पत्ता लगाउन अनुसन्धान गरिरहेको छ ।
