काठमाडौं । संसदको राज्य व्यवस्था तथा सुशासन समितिका सभापति रामहरि खतिवडाले मंगलबार पदबाट राजीनामा दिएका छन् ।
‘कुलिङ पिरियड’मा भएको छेडखानी प्रकरणमा छानबिन विशेष समितिले जिम्मेवार रहेको स्पष्ट पारेपछि खतिवडाले प्रतिनिधिसभाको बैठकमै आफ्नो राजीनामाको घोषणा गरेका हुन् ।
प्रतिनिधिसभाको बैठकलाई सम्बोधन गर्दै खतिवडाले समितिको सभापति पदबाट राजीनामा दिने घोषणा गरे ।
उनले छानबिन विशेष समितिको प्रतिवेदनप्रति सम्मान प्रकट गरेका छन् ।
प्रतिवेदनमा भनिएको थियो, ‘परिमार्जित मस्यौदा प्रतिवेदन समितिका सदस्यहरूलाई देखाई छलफल गरी सभामा पेस गर्नुपर्नेमा अनौपचारिक बैठक बसेर मिति २०८२।०२।१३ मा प्रतिवेदन पठाइएको देखिन्छ । जसले सभापतिको समन्वयकारी भूमिकामा कमी भएको पुष्टि गर्छ।’ साथै, प्रतिवेदन सभापतिको हस्ताक्षरबाट पेस भए पनि ‘उत्तरदायीपूर्ण भूमिका नभएको’ ठहर गरिएको छ ।
समितिका सचिव सुरजकुमार दुराको पनि भूमिका प्रतिवेदनमा कमजोर देखिएको छ । सचिवको हैसियतमा उनले उपसमिति र समितिको बैठकमा प्रारम्भदेखि नै भूमिका निर्वाह गरेको भए पनि जिम्मेवारी पूरा नगरेको भनिएको छ ।
प्रतिवेदनले कर्मचारीहरूबारे पनि टिप्पणी गर्दै ‘कुलिङ अफ पिरियड विषय हटाउन सार्वजनिक रूपमा लबिङ गर्नु पदाधिकारीहरूको पदीय आचरणअनुकूल नभएको’ उल्लेख गरेको छ ।
त्यस्तै, राज्य व्यवस्था समितिले पारित गरेको उक्त विषयमा सार्वजनिक रूपमा विपक्षमा देखिनु पनि शोभनीय नभएको प्रतिवेदनमा उल्लेख छ ।
‘कुलिङ पिरियड’को छेडखानी प्रकरणबारे छानबिनका लागि प्रतिनिधिसभाले विशेष समिति गठन गरेको थियो ।
सो समितिले विस्तृत अध्ययनपछि दोषीहरू किटान गर्दै प्रतिवेदन पेस गरेको थियो । प्रतिवेदनमा सभापति खतिवडालाई पनि घटनाप्रति संवेदनशील नबनेको र आफ्नो भूमिकामा कमी देखाएको निष्कर्ष निकालिएको छ ।
उनले आफ्नो पदबाट अलग भए पनि प्रतिनिधिसभाको सदस्यको जिम्मेवारी भने निरन्तर वहन गर्ने बताएका छन् । खतिवडाको राजीनामासँगै राज्य व्यवस्था तथा सुशासन समितिको सभापति पद रिक्त भएको छ ।
प्रतिनिधिसभाको आगामी बैठकमा नयाँ सभापति चयनको प्रक्रिया अघि बढ्ने अपेक्षा गरिएको छ ।
