एजेन्सी । अमेरिकी राष्ट्रपति डोनाल्ड ट्रम्पले भारतलाई झनै ठूलो झट्का दिने आफ्नो योजना रहेको बताएका छन् । तर, रूसी राष्ट्रपति भ्लादिमिर पुटिनको टेलिफोन आएपछि आफूले तत्काल त्यसो नगरेको ट्रम्पको भनाइ छ ।
प्रतिबन्ध लगाएको रूसबाट तेल खरिद गरेको भन्दै अमेरिकाले गत बुधबार भारतबाट आयात हुने वस्तुमा भन्सारदर ५० प्रतिशत पुर्याएको थियो । रूसबाट तेल खरिद गरेर भारतले युक्रेनविरुद्धको युद्धमा सघाएको अमेरिकी आरोप छ ।ट्रम्पले रूसका राष्ट्रपति भ्लादिमिर पुटिनसँग यही अगष्ट १५ का दिन अलास्कामा भेटवार्ता गर्दैछन् । उक्त वार्ता हुनुअघि ट्रम्पले भारतविरुद्ध आफ्नो योजनाबारे बोलेका हुन् ।
‘म यसभन्दा निकै ठूलो कदम (भारतविरुद्ध) उठाउने पूरै तयारीमा थिएँ, तर मलाई एक टेलिफोन आयो कि उनी (पुटिन) भेटघाट गर्न चाहन्छन् । हेरौँ, पुटिन मसँग कुन मामिलामा भेटघाट गर्न चाहन्छन् !’, भारतलाई जोड्दै ट्रम्पले भनेका छन्, ‘म युद्धविराम चाहन्छु, म त्यस्तो एक सम्झौता चाहन्छु-जो दुबै पक्षका लागि होस् ।’भारतविरुद्ध कर लगाउँदा रूसी अर्थव्यवस्था प्रभावित हुने तर्क पनि ट्रम्पले गरेका छन् । उनले भनेका छन्, ‘रूसको अर्थव्यवस्था राम्रो अवस्थामा छैन, निकै प्रभावित भइसकेको छ । यस्तो स्थितिमा अमेरिकी राष्ट्रपतिले रूसको सबैभन्दा ठूलो या दोस्रो ठूलो तेल खरिदकर्तालाई रूसबाट तेल खरिद गरेमा ५० प्रतिशत कर लगाइदिन्छ भने त्यो उसको लागि ठूलो झट्का हो ।’
