विराटनगर । भारतको बिहार, फार्बेसगंज घर बताउने एक युवकलाई बालबालिका तथा अशक्त व्यक्तिहरूलाई भिक्षा माग्न लगाएको आरोपमा विराटनगरमा पक्राउ गरिएको छ ।
महानगर प्रहरीका प्रमुख राजन पौडेलका अनुसार सो युवकले जोगबनी, फार्बेसगंज लगायतका विभिन्न स्थानबाट ५०–६० जना बालबालिका र अशक्त, असहाय मानिसलाई जम्मा पारी विराटनगरको शनि मन्दिर तथा आसपासका मन्दिर र बजार क्षेत्रमा भिक्षा माग्न लगाउँदै आएको पाइएको छ ।
भिक्षाबाट संकलित रकम आफूले मात्र लिने गरेको गुनासो स्थानीयवासीले गरेका थिए ।
लगातार केही दिनसम्म नगर प्रहरीले गरेको निगरानीपछि शनिबार उनलाई नियन्त्रणमा लिइएको हो ।
पक्राउ परेका युवकलाई आवश्यक कारबाहीका लागि वडा प्रहरी कार्यालय विराटनगरमा बुझाइएको नगर प्रहरीले जनाएको छ ।
