चिनियाँ राष्ट्रपति सी चिनफिङले रुसी राष्ट्रपति भ्लादिमिर पुटिनसँग टेलिफोन वार्ता गरेका छन्।
वार्ताका क्रममा राष्ट्रपति सीले युक्रेन संकटप्रति चीनको अडान दोहोर्याउँदै यस जटिल समस्याको कुनै सरल समाधान नरहेको उल्लेख गरेका छन् ।
राष्ट्रपति सीले भने, ‘युक्रेन संकट जस्तो जटिल मुद्दा समाधान गर्न सजिलो उपाय हुँदैन। परिस्थिति जस्तोसुकै भए पनि चीनले आफ्नो स्थिर र सैद्धान्तिक अडान कायम राख्नेछ । शान्तिका लागि संवादलाई अघि बढाउने प्रयत्न जारी राख्नेछ।’
उनले रुस र अमेरिकाबीचको संवादलाई स्वागतयोग्य कदम भन्दै दुई देशबीचको सम्बन्ध सुधार र युक्रेन संकटको राजनीतिक समाधानलाई अगाडि बढाउन सहयोग पुर्याउने विश्वास व्यक्त गरे।
टेलिफोन वार्तामा दुवै राष्ट्रपतिले आउँदो शाङ्घाई सहयोग संगठन (एससीओ) शिखर सम्मेलनसम्बन्धी तयारीमा सहकार्य गर्ने सहमति जनाएका छन्।
सम्मेलन चीनको तिआनजिन शहरमा आयोजना हुने भएको छ। दुवै नेताले सम्मेलनलाई ‘मैत्री, ऐक्यबद्धता र सकारात्मक उपलब्धिको सफल मञ्च’ बनाउने प्रतिबद्धता व्यक्त गरे।
राष्ट्रपति सीले जोड दिँदै भने,‘चीन र रुसबीचको सहकार्यले शाङ्घाई सहयोग संगठनको गुणस्तरीय विकासमा टेवा पुर्याउनेछ।’
चीनको यस्तो प्रयासलाई असैन्य, संवादमुखी, बहुपक्षीय समाधानको रणनीतिको प्रतिबिम्ब भनिउको छ । रुससँगको गहिरो साझेदारी कायम राख्दै चीन अन्तर्राष्ट्रिय समुदायमा संयमित मध्यस्थकर्ताको छवि बनाउने कोसिसमा छ ।
रुस–युक्रेन युद्ध सन् २०२२ को फेब्रुअरीदेखि जारी छ। चीनले सुरूदेखि नै यो युद्धमा तटस्थताको नीति लिँदै आएको छ। उसले यस तनावक शान्तिपूर्ण समाधानको पक्षमा आफूलाई उभ्याउँदै आएको छ।
रुससँगको रणनीतिक साझेदारी कायम राख्दै चीनले युक्रेन संकटमा ‘संवाद र कूटनीति’बाट समाधान खोज्नुपर्ने धारणा अघि सार्दै आएको छ। शुक्रबार भएको टेलिफोन वार्ता त्यसैको निरन्तरताका रुपमा चिनियाँ सञ्चारमाध्यमले व्याख्या गरेका छन् ।
भेट होलान् ट्रम्प–पुटिन ?
अमेरिकी राष्ट्रपति डोनाल्ड ट्रम्पका विशेष दूत स्टीभ विटकोफ र रुसी राष्ट्रपति भ्लादिमिर पुटिनबीच साउन २१ गते मस्कोमा करिब तीन घण्टा लामो बैठक भएको छ। ट्रम्पले उक्त बैठकलाई फलदायी भएको बताएका छन्।
न्यूयोर्क टाइम्सका अनुसार ट्रम्पले अबको साता भ्लादिमिर पुटिनसँग प्रत्यक्ष भेट गर्ने योजना बनाएका छन्। उनले युक्रेनी राष्ट्रपति भ्लादिमिर जेलेन्स्कीलाई समेत समेटेर त्रिपक्षीय बैठक गर्ने चाहना राखेका छन् ।
राष्ट्रपति पुटिनले आफ्नो भनाइमा युएई (संयुक्त अरब इमिरेट्स) सम्भावित स्थल हुन सक्ने संकेत दिएका छन्।
फक्स न्यूजका अनुसार ट्रम्प र पुटिनबीचको सम्भावित अर्को बैठक आगामी सोमबार, अगस्त ११ (साउन २६), इटालीको रोम शहरमा हुन सक्ने अनुमान छ।
रुस–युक्रेन युद्ध जारी रहेकै बेला ट्रम्प सक्रिय कूटनीतिक भेटघाटमा देखिएका छन्। पुटिनसँगको भेटले अमेरिकी र रुसी सम्बन्ध सुधारका पहललाई नयाँ दिशा दिने विश्वास गरिएको छ।
