गत असार २४ गते बिहान नेपाल-चीन सीमास्थित रसुवागढीमा आएको बाढीमा परेर बेपत्ता प्रहरी जवान मुन्ना ठाकुरको शव नभेटिएपछि कुशको शव बनाएर अन्त्येष्टि गरिएको छ।
बाराको फेटा गाउँपालिका–१ निवासी २४ वर्षीय ठाकुरको महिना बित्दा पनि शव नभेटिएपछि परिवारका सदस्यले शुक्रबार कुशको शव बनाएर अन्तिम संस्कार गरेका हुन्।
ठाकुरका एकजना नाबालक छन् । कुशको शव बनाएर अन्त्येष्टि गरिँदा परिवारका सदस्यसहित गाउँले शोकमग्न देखिए ।
उनको दरबन्दी जिल्ला प्रहरी कार्यालय पर्सामा थियो । तर उनी रसुवाको टिमुरे इलाका प्रहरी कार्यालयमा थिए । असार २४ गते राति बाढी आएपछि उद्धारमा जाने क्रममा उनी बाढीमा परेका थिए । तिब्बततर्फको ल्हेन्दे खोलाको बाढीले उनलाई पनि बगाएर बेपत्ता पारेको थियो ।
बाढीले उद्धारमा ठाकुरसहित प्रहरी सहायक निरीक्षक लालबहादुर श्रेष्ठ, प्रहरी जवान लोकेन्द्र बोहोरा, ६ चिनियाँ नागरिक र ११ स्थानीयबासीलाई पनि बगाएको थियो ।
उक्त घटनामा परेर बेपत्ता प्रसनि श्रेष्ठको शव त्यहाँदेखि सय किलोमिटर भन्दा तल चितवनस्थित त्रिशूली नदी किनारमा भेटिएको थियो । तर त्यसपछि अन्य बेपत्ता फेला परेका छैनन् ।
