काठमाडौं । भारतको उत्तराखण्डमा आएको बाढीपहिरोमा परी जाजरकोटका सात जनाको मृत्यु भएको छ ।
ज्यालामजदुरीका लागि भारतको उत्तराखण्ड पुगेका कुशे गाउँपालिका–२ टालेगाउँका १३ जना सो बाढीपहिरोमा परी बेपत्ता भएका थिए ।
बेपत्तामध्ये सात जनाको मृत्यु भएको हो भने अन्य ६ जना सम्पर्कविहीन रहेका छन् । सडक, मन्दिर, घर निर्माणमा ज्यालामजदुरीको काम गर्न पुगेका नागरिक सम्पर्कविहीन भएका छन् ।
कुशे गाउँपालिकाका अध्यक्ष हरिचन्द्र बस्नेतका अनुसार भारतको उत्तराखण्डमा ज्यालामजदुरी गर्न गएका कुशे गाउँपालिका–२ टालेगाउँका अन्दाजी ४२ वर्षीय कर्णबहादुर सिंह, अन्दाजी ४२ वर्षीय रामबहादुर सिंह, अन्दाजी ४५ वर्षीय मानबहादुर सिंह, अन्दाजी ३५ वर्षीय निमबहादुर सिंह, अन्दाजी २४ वर्षीय रविन सिंह र जुम्ला जिल्ला तातोपानी गाउँपालिका घर भई ससुरालीमा बस्दै आउनुभएका जनकबहादुर शाही, रुकुमपश्चिम घर भई ससुरालीमा बस्ने नाम नखुलेका एक व्यक्तिको मृत्यु भएको खबर प्राप्त भएको छ ।
गाउँपालिकाले बिहीबार शोक विज्ञप्ति जारी गरी १३ जनाभन्दा बढी व्यक्ति सम्पर्कविहीन भएको जानकारी दिएको छ । साउन २० गते ठुलो पानी परेपछि काममा नगइका टेन्टमै बसेका सबैको मृत्यु भएको सम्पर्कमा आएकाले उनले बताए ।
ज्यालामजदुरीको खोजीमा भारत पुगेका उनीहरुको मृत्यु भएपछि घरपरिवार चिन्तित भएका छन् ।
भारतमा बेपत्ता नागरिकको खोज तथा उद्धार कार्यलाई प्रभावकारी बनाउन कुशे गाउँपालिकाले नेपाल सरकार, परराष्ट्र मन्त्रालयमार्फत पहल गर्न सरकारको ध्यानाकर्षण गराएको छ ।
भारतको उत्तराखण्ड उत्तरकाशी जिल्लाको हर्सिल उपत्यकामा मंगलबार गएको बाढिपहिरोबाट धराली गाउँमा ठुलो धनजनको क्षति भएको थियो । सो बाढीपहिरोमा परी जाजरकोटका सात जनाको मृत्यु भएको हो ।
