एजेन्सी । यस वर्षको नाडा अटो प्रदर्शनी आगामी भदौ ३ गतेदेखि ८ गतेसम्म सञ्चालन हुने भएको छ । नाडा अटो प्रदर्शनीका बारेमा जानकारी दिन आज पुल्चोकमा आयोजित पत्रकार सम्मेलनमा नाडा अटोमोबाइल्स एसोसिएसन अफ नेपालका अध्यक्ष करण चौधरीले नवप्रवर्तन र भविष्यका लागि यस पटकको प्रदर्शनी फरक बनाउने योजना रहेको बताए ।
‘नवप्रवर्तन र भविष्यका लागि सोचेका छौँ, नेपाली उपभोक्तालाई भविष्यसँग जोड्न चाहन्छौँ, नाडा अटो सो–२०२५ लाई नेपालको अटोमोटिभ उद्योगमा नवप्रवर्तन र उत्साहको नयाँ अध्याय, उन्नत प्रविधि र भविष्यतर्फको कदमका रूपमा लिएका छौँ’, उनले भने ।
नाडा अटोमोबाइल्स एसोसिएसन अफ नेपालको आयोजनामा काठमाडौँको भृकुटीमण्डपमा हुने प्रदर्शनीमा एक सय २५ भन्दा बढी प्रदर्शकका १९ वटा चारपाङ्ग्रे सवारी, १३ वटा हल्का व्यावसायिक सवारीसाधन, चार वटा दुईपाङ्ग्रे सवारी र ३५ कम्पनी (ल्युब्रिकेन्ट, टायर, ब्याट्री, ग्यारेज उपकरण र वित्तीय संस्थाहरू) बिक्रीका लागि राखिने जानकारी गराइएको छ । प्रदर्शनीमा एक लाखभन्दा बढी आगन्तुक आउने अपेक्षा गरिएको छ ।
अटो प्रदर्शनीमा युनिट्री रोबोट्सका स्वचालन र कृत्रिम बुद्धिमत्ताको नयाँ युगको प्रतीकस्वरूप उन्नत चारपाङ्ग्रे रोबोटहरू मुख्य आकर्षण रहने अध्यक्ष चौधरीले जानकारी गराए । ‘यो प्रदर्शनी मात्र नभइ नेपालको दिगो, आधुनिक र भविष्यमुखी मोबिलिटी को प्रतिबिम्ब हो’, उनले भने ।
‘गो फर मुभ’भन्ने नारासहित आयोजना हुने यस वर्षको प्रदर्शनीले नवीनतम प्रविधि, ग्राहक संलग्नता र अटो क्षेत्रको सम्पूर्ण पारिस्थितिकीतन्त्रलाई एकै छानामुनि ल्याउने विश्वास लिइएको छ । सशक्त साझेदारी र व्यवस्थापनसहित हुने यस प्रदर्शनीका लागि तीन लाख वर्गफुट क्षेत्रफल र एक लाख ६२ हजार ५०० वर्गफुट प्रदर्शनी क्षेत्रसहित यो नेपालको अहिलेसम्मकै सबैभन्दा ठूलो अटो प्रदर्शनी हुने आयोजकले जनाएको छ ।
प्रदर्शनीमा सुविधाजनक क्षेत्र विभाजन गरी चारपाङ्ग्रे, दुईपाङ्ग्रे, व्यावसायिक सवारी, अटो पाट्र्स, वित्तीय सेवालगायत सुविधा र सुरक्षा सुनिश्चित गर्ने व्यवस्था मिलाइएको अध्यक्ष चौधरीले जानकारी दिए ।
उपाध्यक्ष राजनबाबु श्रेष्ठले नाडा अटो नाडा अटोमोबाइल्स एसोसिएसन अफ नेपाल आटो मोबाइल क्षेत्रलाई सुरक्षित, विश्वासनीय र अन्तरराष्ट्रियस्तरको विश्वासिलो बनाउन लागिपर्ने बताए ।
