विराटनगर । कोशी प्रदेशका तीन जिल्लामा शृङ्खलाबद्ध रूपमा ट्रान्सर्फमर चोरी गर्ने गिरोहलाई प्रहरीले पक्राउ गरेको छ ।
सुनसरी, मोरङ र झापाका विभिन्न स्थानबाट २२ वटा ट्रान्सफर्मर चोरी गर्ने सात जना र चोरिएको ट्रान्सर्फमर किन्ने पाँच जनालाई प्रहरीले पक्राउ गरेको हो ।
प्रहरीका अनुसार चोरीमा संलग्न भएको आरोपमा प्रहरीले जिल्ला मोरङ ग्रामथान गाउँपालिका– ४ का ४२ वर्षीय अर्जुनकुमार माझी (चौधरी), ग्रामथान– ५ का ३१ वर्षीय इरज धामी, सुनसरी दुहबी नगरपालिका– ३ का ३५ वर्षीय अनुज विश्वास (चौधरी), दुहबी नगरपालिका – २ का ३९ वर्षीय प्रयाग कुमार खाँ चौधरी, मोरङ बेलबारी नगरपालिका – ४ का २६ वर्षीय अर्जुन चौधरी बेलबारी– ३ का २७ वर्षीय रञ्जित तामाङ र देश भारत घर दुहबी नगरपालिका – ४ स्थित ससुराली घरमा बस्दै आएका ३४ वर्षीय आलम मियालाई पक्राउ गरेको हो ।
यसैगरी, चोरीको सामान किनेको आरोपमा प्रहरीले विराटनगर महानगरपालिका– ३ का ५३ वर्षीय लक्ष्य प्रधान, मोरङ विराटनगर महानगरपालिका – ६ का ६२ वर्षीय कृष्णगोपाल ताम्राकार, सुनसरी दुहबी नगरपालिका– ३ का ३२ वर्षीय योगेश अग्रवाल, दुहबी २ का ३१ वर्षीय कपिल भट्ट, इटहरी उपमहानगरपालिका– ४ का ३९ वर्षीय सिताराम राईलाई पक्राउ गरेको हो ।
गत माघ १५ यता मोरङमा ८ स्थान, सुनसरीमा १२ र झापामा २ वटा ट्रन्सफर्मर चोरी भएको थियो ।
ट्रान्सफर्मर चोरी गर्ने गिरोहले चोरी गर्दै खरिद गर्ने व्यक्तिलाई बेच्दै आएका थिए ।
यो गिरोहले २ करोड मूल्य बराबरका २२ वटा ट्रान्सफर्मर चोरी गरेको थियो ।
प्रहरीले चोरीमा प्रयोग भएका औजार डायल रेन्च थान २२, सलाई रेन्व थान ३, पिलास थान ३, पेचकस थान ३, छिनो थान १, साङली धान १, कैची थान १, ह्याक्सो बिलेट ३ थानलगायत सामान बरामद गरेको छ ।
प्रहरीले चोरीमा प्रयोग भएको ६ वटा मोटरसाइकल पनि बरामद गरेको छ ।
यो गिरोहले गत माघ १५ गतेदेखि चोरी गर्दै आएको थियो साउन ९ गते मोरङको रंगेली नगरपालिका– ९ इटाभट्टा टोलमा ट्रान्सफर्मर चोरी गर्न गएका ४२ वर्षीय अर्जुनकुमार थारु पक्राउ परेपछि प्रहरी गिरोहसम्म पुगेको थियो ।
ट्रान्सफर्मर चोरीको गिरोह खोज्नका लागि प्रदेश प्रहरी र जिल्ला प्रहरी कार्यालयबाट संयुक्त रुपमा टोली खटिएको थियो ।
