भारतले अफ्रिकी मुलुक सोमालियालाई मानवीय सहायता प्रदान गरेको छ । भारतले सोमालियामा १० टन मानवीय सहायता सामग्री प्रदान गरेको हो ।
सामाजिक सञ्जाल एक्समा पोस्ट गर्दै भारतको विदेश मन्त्रालयले यसबारे जानकारी दिएको हो । मन्त्रालयका अनुसार सहायता सामग्रीमा आवश्यक औषधि, शल्यक्रिया सामग्री, अस्पतालका आवश्यक वस्तु र बायोमेडिकल उपकरण समावेश छन् ।
सहायता प्याकेजमा भारतीय झण्डा र ‘भारतका जनता र सरकारबाट उपहार’ लेखिएको छ । सोमालिया लामो समयदेखि आन्तरिक द्वन्द्व, जलवायु संकट र आर्थिक कठिनाइबाट प्रभावित रहँदै आएको छ ।
भारतीय समाचार संस्था एएनआईका अनुसार सोमालियालाई हाल ला निनाले प्रभावित बनाएको छ । यस कारण सन् २०२५ को मध्यसम्म त्यहाँ खडेरी र खाद्य असुरक्षाको जोखिम छ ।
अहिले त्यहाँका करिब ६० लाख मानिसलाई तत्काल जीवन रक्षक सहायता आवश्यक छ । विश्वकै गरिब मुलुकको सूचीमा आउने सोमालियाका १८ लाख बालबालिका कुपोषणको जोखिममा छन् ।
