सुन्दरहरैंचा । पत्थरघट्टा युवा समाज, सुन्दरहरैंचा–११ ले एकदिने अटिजम अभिमुखीकरण आयोजना गरेको छ ।
सुन्दरहरैंचा नगरपालिका-७ स्थित पोखरेल बंश प्रतिष्ठान हलमा आयोजित उक्त कार्यक्रममा नगरभित्रका विद्यालयका शिक्षक-शिक्षिकाहरू सहभागी थिए ।
कार्यक्रमका प्रमुख अतिथिका रूपमा सुन्दरहरैंचाका पूर्व नगरप्रमुख शिव ढकाल तथा वर्तमान नगरप्रमुख केदार प्रसाद गुरागाईंले सहभागिता जनाएका थिए ।
साथै, कार्यक्रममा वडा नम्बर २ का वडा अध्यक्षसहित विभिन्न १४ विद्यालयका प्रधानाध्यापकहरूको समेत उपस्थिति थियो ।
उक्त अभिमुखीकरण तालिममा प्रशिक्षकका रूपमा चन्द्रकला घिमिरे तथा उनको समर्पित टोलीले प्रशिक्षण दिएको थियो ।
तालिममा सहभागी शिक्षकहरूलाई अटिजमको पहिचान, व्यवहारगत विशेषता, र बालमैत्री सहकार्यका तरिकाहरूमा व्यावहारिक जानकारी प्रदान गरिएको थियो ।
कार्यक्रमको आयोजनाबाट शिक्षा क्षेत्रमा अटिजमप्रति चेतना अभिवृद्धि हुनुका साथै समावेशी शिक्षाको अवधारणा सुदृढ हुने अपेक्षा गरिएको छ।
पत्थरघट्टा युवा समाजले आगामी दिनमा यस्ता सामाजिक र शैक्षिक कार्यक्रमलाई निरन्तरता दिने प्रतिबद्धता व्यक्त गरेको छ ।
