विश्व बाघ दिवस नेपालमा पनि विभिन्न कार्यक्रमको आयोजना गरी मनाइएको छ ।
पाटेबाघ संरक्षणको महत्वबारे जनचेतना फैलाउने उद्देश्यले हरेक वर्ष जुलाई २९ मा विश्व बाघ दिवस मनाइन्छ ।
सन् २०१० मा रुसको सेन्टपिटर्सवर्गमा आयोजित अन्तरराष्ट्रिय बाघ मञ्चले उक्त घोषणा गरेसँगै विश्व बाघ दिवस मनाउन थालिएको हो । नेपालमा पनि दिवसका अवसरमा वन तथा वातावरण मन्त्रालयले विभिन्न कार्यक्रम गर्दै आएको छ ।
विश्व बाघ दिवसका अवसरमा चितवन राष्ट्रिय निकुञ्ज कसरामा विशेष कार्यक्रमको आयोजना गरेको थियो ।
कार्यक्रममा वन तथा वातावरण मन्त्रालयका सचिव डाक्टर राजेन्द्र प्रसाद मिश्रले बाघको संरक्षण क्षेत्रमा चुनौती र अवसरहरूको बाबजुद सरकारले आवश्यक लगानी गर्न नसकेको बताए । उनले बाघ लगायतका वन्यजन्तु संरक्षणमा तीनै तहको सरकार मिलेर अघि बढ्नुपर्ने जिकिर गरे ।
राष्ट्रिय निकुञ्ज तथा वन्यजन्तु विभागका निमित्त महानिर्देशक हरिभद्र आचार्यले बाघ जस्तो सुन्दर प्रजातिलाई बचाउन जरुरी रहेको बताए ।
सन् २०२२ मा गरिएको पछिल्लो राष्ट्रिय बाघ गणनाअनुसार नेपालमा हाल बाघको सङ्ख्या ३५५ पुगेको छ ।
नेपालमा बाघको सङ्ख्या लक्ष्यभन्दा धेरै वृद्धि भएसँगै यिनको व्यवस्थापन, मानव–बाघ द्वन्द्व, वासस्थानलगायत विविध चुनौतीसमेत देखिएका छन् ।
