प्रधानमन्त्री केपी शर्मा ओलीले अहिलेको सरकार काम गर्नका लागि बनेको बताएका छन् ।कैलालीको जानकी गाउँपालिका-९ कटासेस्थित रानी जमरा कुलरिया आयोजनाको सिचाईँतर्फको थप सिँचाइ, जलविद्युत र प्रसारण लाइनको मंगलबार उद्घाटनका क्रममा उनले यस्तो बताएका हुन् ।
‘यो सरकार बनेको सरकार बनाउनका लागि होइन । यो देशमा स्थिरता स्थायित्व र विकासका लागि बनको हो । जनतालाई सेवा सुशासन दिन र भ्रष्टाचार नियन्त्रण गर्न यो सरकार बनेको हो’, उनले भने, ‘हामी काम गर्दैछौँ, विकास गर्दैछौँ । हामी देश बनाउन लागिरहेका छौँ ।’
ओलीले परम्परागत शैलीमा आफूले कसैलाई भ्रष्टाचार गर्न नदिने बताए । ‘म पनि भ्रष्टाचार गर्दिनँ, अरुलाई पनि गर्न दिन्नँ । लुकिचोरी भ्रष्टाचार गरेको थाहा पाए, त्यो मान्छे जेल जान्छ’, उनले अगाडि भने ।
आफूले रेल र पानीजहाजका कुरा गर्दा उडाउनेहरूलाई परिणाम देखाउने उनले बताए । जनकपुरमा रेल आइसकेकाले अब दार्जीलिङको रेल भनेर गीत गाउन जरूरी नभएको पनि उनले बताए ।
‘हामीले रेल र पानी जहाज चलाउँछौँ भन्दा हावा कुरा भनेर उडाउँछन् । अहिले पनि दार्जीलिङको रेल भन्दै उफ्रिन्छन् । अब दार्जीलिङको रेल होइन, जनकपुरको रेल भनेर नाच्नू’, उनले भने, ‘अब हामी पानी जहाज चलाएर कोशी, गण्डकी र कर्णालीबाट गंगामा पुग्न सकिन्छ । गंगाबाट हामी कोलकाता पुगेर समुद्रसम्म जोडिन सक्छौँ ।’
उनले नेपालमा अझै २५ लाख हेक्टर सिँचाइयोग्य जमिन रहेको बताए । ‘अझै १० लाख हेक्टरमा सिँचाइ पुर्याउने कोसिस जारी छ’, उनले भने, ‘अहिले बाह्रै महिना ५ लाख हेक्टरमा सिँचाइ पुग्छ । मैले सुनकोशी मरिन डाइभर्सन आयोजना सुरू गरेको थिएँ तर सरकार तलमाथि हुँदा ढिला भएको थियो । अब त्यो आयोजना बनेर मधेशमा डेढ लाख बिघामा सिँचाइ पुग्नेछ ।’
