सिन्धुलीको गोलन्जोर गाउँपालिका–६ बाट एकै परिवारका १६ जना बेपत्ता भएको घटनामा एक जना सदस्य प्रहरी सम्पर्कमा आएकी छन्।
जिल्ला प्रहरी कार्यालय सिन्धुलीका अनुसार हायू परिवारकी माइली छोरी सुजाता हायू सम्पर्कमा आएकी हुन् । उनी पहिलेदेखि नै काठमाडौंमा श्रीमानसँग बस्दै आएको प्रहरीले बताएको छ ।
जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) सूर्यप्रकाश सुवेदीका अनुसार प्रहरीको सम्पर्कमा आएकी सुजाताले परिवारका अन्य सदस्य आफ्नो सम्पर्कमा नरहेको भन्दै खोजीदिन आग्रह गरेकी छन् ।
उनले भने, ‘बेपत्ता हायू परिवारकी छोरी सुजाता हाम्रो सम्पर्कमा आएकी छन्। उनले आफू लामो समयदेखि श्रीमानसँग काठमाडौंमा बस्दै आएको बताएकी छन् । परिवारका अन्य उनको सम्पर्कमा छैनन् । ’
यसअघि सोमबार गोलन्जोर गाउँपालिकाले सुजातासहित परिवारका १६ जना सदस्य बेपत्ता भएको भन्दै नामावली सार्वजनिक गरेको थियो। उनीहरू गत शुक्रबारदेखि सम्पर्कविहीन रहेको गाउँपालिकाले जनाएको थियो।
