नक्कली सुन देखाएर ठगी गरेको अभियोगमा प्रहरीले २ जनालाई शुक्रबार पक्राउ गरेको छ । पक्राउ पर्नेहरूमा मध्यपुर थिमी नगरपालिका-८ बोडे बस्ने सिन्धुपाल्चोक बाह्रबिसे नगरपालिका-५ घर भएका २८ वर्षीय बुद्धिबहादुर तामाङ र चाँगुनारायण नगरपालिका-८ सुडाल बस्ने नुवाकोटका २२ वर्षीय सुमन तामाङ छन् ।
उनीहरूले नक्कली सुन देखाई प्रतितोला १ लाख १० हजार रूपैयाँमा दिन्छु भनेर प्रलोभनमा पारेको खुलेको छ ।
दुवैले २०८१ फागुन २५ गते सूर्यविनायक नगरपालिका-६ बस्ने ओखलढुङ्गा घर भएका पीडितलाई भक्तपुर इबामोरा चोकनजिक बोलाई उनको साथबाट १२ लाख रूपैयाँ ठगेको खुलेको छ।
यी दुईजनाले २०८२ जेठ २७ गते भक्तपुर राधेराधे बस्ने दोलखाका पीडितलाई भक्तपुर पान्डुबजारनजिक बोलाई ९ लाख ५० हजार रूपैयाँ लिई फरार भएको प्रहरीको अनुसन्धानले देखाएको छ ।
घटनाको अनुसन्धान गर्ने क्रममा काठमाडौं उपत्यका अपराध अनुसन्धान शाखा कार्यालय भक्तपुरबाट खटिएको टोलीले उनीहरूलाई भक्तपुरबाटै पक्राउ गरेको हो । उनीहरूलाई आवश्यक अनुसन्धान तथा कारवाहीको लागि जिल्ला प्रहरी परिसर भक्तपुर पठाइएको छ ।
