विराटनगर । विराटनगरको कान्तिपुर कलेजले कक्षा ११ मा भर्ना भएका नयाँ विद्यार्थीहरूलाई स्वागत तथा अभिमुखीकरण गरेको छ ।
पूर्णकालीन दक्ष शिक्षकले अध्यापन गराएर उत्कृष्ट नतिजा आत्मसात् गर्दै आएको कान्तिपुर कलेज विराटनगरस्थित सिटी पार्टी प्यालेसमा भव्य कार्यक्रमको आयोजना गरेर विद्यार्थीहरूलाई स्वागत तथा अभिमुखीकरण गरेको हो ।
माध्यमिक शिक्षा परीक्षा (एसइई) पास गरेर कान्तिपुरमा भर्ना लिएका नवआगन्तुक १ हजार ६५ विद्यार्थीलाई स्वागत गरेको कलेजले शैक्षिक संरचना, नीति-नियम, अवसर र शिक्षण पद्धतिबारे जानकारी दिएको हो ।
विद्यार्थी, अभिभावक तथा विभिन्न आगन्तुकबीचमा कलेजले ११औं ब्याचका विद्यार्थीहरूलाई सम्मान गर्दै अभिमुखीकरण कार्यक्रम गरेको थियो ।
कलेजका प्रिन्सिपल भुवन नेपालले यस वर्ष विज्ञान संकायमा ४०५, व्यवस्थापन संकायमा ५१० र होटल व्यवस्थापन संकायमा १५० जना गरी कुल १ हजार ६५ जना विद्यार्थी भर्ना भएको जानकारी दिए ।
दुई हजारभन्दा बढी विद्यार्थीहरूले प्रवेश परीक्षा दिएकोमा उत्कृष्ट नतिजा ल्याउने विद्यार्थीहरूको छनोट गरिएको बताउँदै उनले प्रत्येक वर्ष उत्कृष्ट शैक्षिक परिणाम ल्याउने क्रम जारी राखेकै कारण कान्तिपुर कलेज विद्यार्थी र अभिभावकको पहिलो रोजाइमा पर्न सफल भएको बताए ।
४.० जिपिए ल्याएका विद्यार्थीहरूको पनि पहिलो रोजाइ कान्तिपुर नै बनेको उनको भनाइ छ ।
कार्यक्रममा बोल्दै शिक्षा विकास तथा समन्वय इकाई मोरङका प्रमुख जीवन गड्तौलाले विद्यार्थीहरूलाई अनुशासन, परिश्रम र सामाजिक उत्तरदायित्वको सन्तुलन मिलाएर अघि बढ्न सुझाव दिए ।
यसैगरी, कलेजका निर्देशक विष्णु दाहालले अभिभावक र विद्यार्थीको इच्छा भरोसालाई टुट्न नदिनेगरी कान्तिपुर लागिपरेको सुनाए ।
प्रा.डा. तेजनारायण मण्डलले कान्तिपुर कलेजले समाज र देशलाई खाँचो परेका जनशक्ति उत्पादन गर्नेक्रमलाई निरन्तरता दिइरहेको सुनाए ।
कार्यक्रममा कलेजका विद्यार्थीहरूले नेपाली सांस्कृतिक विविधता झल्काउने नृत्य प्रस्तुति गरेर दर्शकको मन जितेका थिए ।
त्यस्तै, एसइईमा ४ जिपीए ल्याउने आयुषा कार्की र प्रवेश परीक्षामा सर्वाधिक अंक ल्याउने विद्यार्थीलाई विशेष सम्मान समेत गरिएको थियो ।
कार्यक्रमले नयाँ विद्यार्थीहरूलाई कलेजको वातावरण र अवसरहरूसँग परिचित गराउनुका साथै उनीहरूमा नयाँ उत्साह थपेको सहभागीहरूको भनाइ छ ।
शिक्षामा नविनता र समय सापेक्ष पाठ्यक्रममार्फत गुणस्तरीय शिक्षा प्रदान गर्दै आएको कान्तिपुर कलेजले आगामी दिनमा पनि विद्यार्थीको भविष्य निर्माणमा सशक्त भूमिका खेल्ने प्रतिबद्धता जनाएको छ ।
विराटनगर–१० स्थित कलेजले पछिल्लो एक दशकयता अब्बल नतिजा दिँदै आएको छ । २०७२ सालमा स्थापित कलेजले उत्कृष्ट नतिजा ल्याउने १०० विद्यार्थीहरूलाई पूर्ण छात्रवृत्तिमा अध्ययन गराउने गरेको छ ।
