विराटनगर । मोरङको बूढीगंगा गाउँपालिकामा एक युवतीको शव सडेको अवस्थामा फेला परेपछि प्रहरीले बलात्कारपछि हत्या भएको आशंका गरेको छ ।
बूढीगंगा गाउँपालिका–६ कोयलपुरस्थित सुनसरी–मोरङ सिँचाइ आयोजनाको नहरनजिकको घारीमा शनिबार अपरान्ह ४ बजेतिर युवतीको शव फेला परेको थियो ।
नग्न अवस्थामा भेटिएको शव सडेर दुर्गन्धित भएको अवस्थामा थियो ।
मृतकको अनुहारलगायत शरीरका विभिन्न भागमा किरा परेर कुहिएको कारण पहिचान गर्न कठिनाइ भएको मोरङ प्रहरी प्रवक्ता प्रहरी नायब उपरीक्षक कोपिला चुँडालले जानकारी दिइन् ।
उनका अनुसार पहिचानको प्रयास गर्दै घटनाको अनुसन्धान तीव्र पारिएको छ ।
“पहिचानका लागि धेरै प्रयासहरु भइरहेका छन् । विभिन्न कोणबाट अनुसन्धान जारी राखिएको छ । तर, पहिचान भइसकेको छैन । मृत्युको कारण पनि यकिन गर्न गाह्रो परिरहेको छ,” डीएसपी चुँडालले भनिन्।
किरा परेर कुहिएको र अनुहार प्रष्टसँग चिन्न नसकिने अवस्थामा भएकाले शवको पहिचान गर्न मुस्किल परिरहेको उनको भनाइ छ ।
शवलाई पोस्टमार्टमका लागि विराटनगरको कोशी अस्पतालमा राखिएको छ ।
घटनास्थल र शवको प्रकृति हेर्दा बलात्कारपछि हत्या गरेजस्तो देखिने प्रहरीको निष्कर्ष छ ।
प्रहरी स्रोतका अनुसार शरीरको माथिल्लो भागमा भित्री कपडा मात्रै लगाएको अवस्थामा शव फेला परेको, कम्मरदेखि मुनिको भागमा कपडा नै नभएको, घटनास्थलमा मृतकका पाइन्ट, चिम्टी र चप्पल छेउमा राखेको अवस्थामा फेला परेको
बाहिरी तथा भित्री वस्त्रसमेत खोलिएको अवस्थामा फेला परेको छ ।
प्रहरीले लगाएका कपडाको आधारमा शव महिलाको हो भनेर यकिन गरेको छ । मृतक २० वर्षमुनिको हुनसक्ने प्रहरीको अनुमान छ ।
कपडा र चप्पल हेर्दा मृतक धेरै टाढाको नभएको अनुमान गरिएको छ ।
“शव धेरै टाढाको युवतीको जस्तो लाग्दैन। कतै डेरा वा कुनै ठाउँमा काम गरेर बस्ने युवती हो कि जस्तो लाग्छ,” प्रहरी स्रोतले भन्यो।
हालसम्म कुनै महिला हराएको भनेर कोही पनि प्रहरीको सम्पर्कमा नआएको डीएसपी चुँडालले बताइन् ।
ललाइफकाइ घारीमा लगेर बलात्कारपछि हत्या गरेजस्तो देखिए पनि हालसम्म प्राप्त तथ्य र प्रमाणबाट पुष्टि हुन नसकेको उनको भनाइ छ ।
घटनालाई तथ्य र प्रमाणबाट स्थापित गर्ने प्रयास भइरहेको प्रहरीको भनाइ छ ।
“कुनै पनि घटना यकिन गर्न आवश्यक प्रमाण जुटाउनुपर्ने हुन्छ। प्रमाण संकलन गर्दै विभिन्न पाटोबाट अनुसन्धान भइरहेको छ,” प्रहरी स्रोतले भन्यो।
