विराटनगर । विराटनगरमा शिक्षकहरूका लागि ‘शिक्षक ज्योति मास्टर क्लास’ हुने भएको छ ।
शिक्षकहरूको व्यावसायिक क्षमता विकास र मानसिक स्वास्थ्यमा केन्द्रित रहेर जेस्ट आर्ट एन्ड लिटरेचर क्लबले मास्टरक्लास नामक कार्यक्रम आयोजना गर्ने भएको हो ।
विराटनगरको बसपार्कस्थित आरके प्यालेसमा आगामी साउन ११ र १२ गते सो कार्यक्रम आयोजना हुने आयोजक संस्थाका शोरेज राज वन्तले जानकारी दिए ।
उनका अनुसार मुख्य प्रशिक्षक कोलकाताका प्रसिद्ध क्लिनिकल साइकोलजिस्ट प्रोफेसर पार्थ राय रहेका छन् ।
उनी साइकोजेनेसिस रिसर्च फाउन्डेसनका संस्थापक सदस्य तथा सचिवसमेत हुन् ।
प्रोफेसर रायले शिक्षकहरूका लागि आधारभूत मानसिक स्वास्थ्य, परम्परागत श्यामपाटी भन्दा बाहिरका शिक्षण विधिहरू, विद्यार्थीहरूको दृष्टिकोणबाट शिक्षण र डिजिटल युगका विद्यार्थीहरूलाई मार्गदर्शन गर्ने विषयमा तालिम प्रदान गर्नेछन् ।
कार्यक्रमको अर्को मुख्य आकर्षण इन्टरएक्टिभ बोर्डको प्रयोगमा तालिम रहेको छ । यसका लागि नेपाल कम्प्युटर एसोसिएसन फेडेरेसन मोरङका कोषाध्यक्ष सुजीत झाले प्रशिक्षण प्रदान गर्नेछन् ।
यो सेसनले शिक्षकहरूलाई आधुनिक प्रविधिको प्रयोग गरेर कक्षाकोठालाई थप रोचक र प्रभावकारी बनाउन सहयोग गर्नेछ ।
प्रति व्यक्ति ५ हजार रुपैयाँ दस्तुर राखिएको आयोजकले जनाएको छ ।
विद्यालयहरूको सामूहिक सहभागितालाई प्रोत्साहन गर्दै शिक्षकहरूलाई सिकाउन, नेतृत्व गर्न र प्रेरणा दिन सक्ने क्षमता विकास गर्न यो कार्यक्रम उपयोगी हुने आयोजकको अनुमान छ ।
