विराटनगर । मोरङको धनपालथान गाउँपालिकाबाट ८०१ किलो लागुऔषध गाँजा बरामद भएको छ ।
मोरङ प्रहरीले धनपालथान–१ गदिया खोलानजिकै उखुबारीबाट बुधबार साँझ उक्त परिमाणमा गाँजा बरामद गरेको हो ।
इलाका प्रहरी कार्यालय रंगेली, प्रहरी चोकी गडेरिया, प्रहरी चौकी अमाहिवरियाती र सशस्त्र प्रहरी बलको बीओपी नोचाबाट खटिएको संयुक्त टोलीले बुधबार साँझ ६ः३५ बजेतिर गाँजा बरामद गरेको हो ।
गाँजा लुकाएर राखिएको विशेष सूचनाका आधारमा बरामद गर्न नेपाल र सशस्त्र प्रहरीको संयुक्त टोली खटिएको थियो ।
मोरङ प्रहरी प्रवक्ता डिएसपी कोपिला चुँडालका अनुसार २६ वटा बोराभित्र प्याक गरेर राखेको अवस्थामा गाँजा बरामद भएको हो ।
बरामद गरेर तौल गर्दा गाँजा ८ सय २ किलो रहेको उनले बताइन् ।
अन्यत्र पनि गाँजा लुकाएर राखिएको हुनसक्ने आशंकामा खोजी भइरहेको प्रहरीको भनाइ छ ।
बरामद भएको गाँजा आवश्यक अनुसन्धानका लागि इलाका प्रहरी कार्यालय रंगेलीमा राखिएको छ ।
गाँजा कसले लुकाएको हो भनेर यकिन छैन । गाँजा बरामद गरेको प्रहरीले यसको धन्दामा संलग्नलाई भने नियन्त्रणमा लिन सकेको छैन ।
