विराटनगर । पूर्णकालीन दक्ष शिक्षकले अध्यापन गराएर उत्कृष्ट नतिजा आत्मसात् गर्दै आएको विराटनगरको कान्तिपुर कलेजप्रति विद्यार्थीको आकर्षण बढ्दो छ ।
कलेजले बिहीबार लिएको प्रवेश परीक्षामा सहभागी भएका विद्यार्थीहरूको चापले गर्दा पनि कान्तिपुरप्रतिको आकर्षण चुलिँदो देखिएको हो ।
गुणस्तरीय शिक्षा प्रदान गरेर विद्यार्थी र अभिभावकहरूको पहिलो रोजाइमा परेको कान्तिपुर कलेजमा कक्षा ११ मा भर्ना हुने विद्यार्थीहरूको उल्लेखनीय चाप देखिएको छ ।
प्रवेश परीक्षामा निर्धारित कोटाभन्दा धेरै विद्यार्थीहरूले सहभागिता जनाएको कलेजका प्रिन्सिपल भुवन नेपालले जानकारी दिए ।
कक्षा ११ को तीन वटा संकायमा कूल १ हजार ५० जनाको कोटा निर्धारण गरिएको भए पनि १ हजार ४ सय ३२ जना विद्यार्थीले प्रवेश परीक्षामा सहभागिता जनाएको उनको भनाइ छ ।
संकायगत कोटा वितरणका आधारमा कलेजमा विज्ञान संकायमा ४ सय ५० जना, व्यवस्थापन संकायमा ४ सय ५० जना र होटल व्यवस्थापन संकायमा १ सय ५० जनाको कोटा निर्धारण गरिएको छ ।
सबै संकायमा कोटाभन्दा बढी विद्यार्थीहरूले प्रवेश परीक्षामा सहभागिता जनाएका हुन् ।
प्रिन्सिपल नेपालका अनुसार एसईईमा ४ जिपिए ल्याउनेदेखि उत्कृष्ट नतिजा ल्याउने विद्यार्थीहरूले कान्तिपुर कलेजलाई आफ्नो पहिलो रोजाइको रूपमा लिएका छन् ।
प्रवेश परीक्षाको परिणामको आधारमा योग्य विद्यार्थीहरू छनोट गरिने र छनोट भएका विद्यार्थीहरूलाई भर्ना प्रक्रिया अगाडि बढाइने कलेजले जनाएको छ ।
प्रवेश परीक्षामा टप १० मा पर्ने विद्यार्थी ५० देखि १०० प्रतिसत छात्रवृत्ति दिने प्रिन्सिपल नेपालले जानकारी दिए ।
साथै एसईईमा ३.९५ देखि ४ जिपिए ल्याउने विद्यार्थीलाई पूर्ण तथा स्कुल प्रथम र जेहेन्दार विद्यार्थीलाई आंशिक छात्रवृत्ति दिने प्रिन्सिपल नेपालले बताए ।
कलेजले आफ्ना विद्यार्थीहरूलाई आधुनिक सुविधा सहितको गुणस्तरीय शिक्षा प्रदान गर्दै आएको छ ।
विराटनगर–१० स्थित कलेजले पछिल्लो एक दशकयता अब्बल नतिजा दिँदै आएको छ ।
सीपमा आधारित शिक्षा प्रदान गर्दै आएको कान्तिपुरले अरू संकायजस्तै होटल म्यानेजमेटतर्फ पनि उत्तिकै जोड दिइरहेको छ ।
कान्तिपुरका १५ जना सञ्चालक र दक्षताले निखारिएका शिक्षकहरूले आफ्नो विशेषज्ञता र अनुभवलाई विद्यार्थीहरूको सेवामा लगाएर उत्कृष्ट परिणामहरू ल्याउन सफल भएका छन् ।
त्यसको ज्वलन्त उदाहरणका रूपमा पहिलो प्रयासमा मेडिकल साइन्सतर्फ पूर्ण छात्रवृत्तिमा नाम निकाल्न सफल राजु महतो, सोनिया कामत र बिराज अधिकारीलाई लिए पुग्छ ।
