विराटनगर । कोशी प्रदेशमा अग्रणी शैक्षिक संस्थाका रूपमा कहलिएको ग्रिनल्यान्ड कलेजले नयाँ शैक्षिक सत्रका लागि बुधबार (आज) प्रवेश परीक्षा लिएको छ ।
कक्षा ११ मा भर्ना हुन चाहने विद्यार्थीहरूलाई विराटनगर–९ मा रहेको कलेजले आज दिउँसो प्रवेश परीक्षा लिएको हो ।
कलेजमा भएको इन्ट्रान्स परीक्षामा विज्ञान संकाय, होटेल मेनेजमेन्ट र व्यवस्थान संकायका गरी एक हजार ५१ जना विद्यार्थीहरूले परीक्षा दिएको कलेजका प्रिन्सिपल दिनेश दाहालले जानकारी दिए ।
प्रिन्सिपल दाहालका अनुसार उनीहरूमध्येबाट ७ सय ५० विद्यार्थीलाई भर्ना दिइने छ ।
कलेजमा प्रवेश परीक्षा दिएका विद्यार्थीहरूलाई एसइईको अंक र प्रवेश परीक्षामा पाएको अंकको आधारमा छुट दिने पनि उनको भनाइ छ ।
यसैगरी नयाँ शैक्षिक सत्रमा सिपमा आधारित शिक्षा प्रदान गर्ने अभिनव पहल थालिएको बताउँदै प्रिन्सिपल दाहालले विद्यार्थीहरूलाई केवल पुस्तकीय ज्ञान मात्र नदिएर व्यावहारिक सीप र दक्षताको विकासमा विशेष जोड दिँदै आएको सुनाए ।
विश्वबजारलाई आवश्यक पर्ने दक्ष जनशक्ति उत्पादन गर्ने ध्येका साथ पाइला अगाडि बढाइरहेको कलेजका प्रिन्सिपल दिनेश दाहालको भनाइ छ ।
कलेजले पूर्णकालीन दक्ष तथा अनुभवी शिक्षकहरूको सहायतामा उत्कृष्ट नतिजा निकाल्दै आएको छ ।
शिक्षकहरूले आफ्नो विशेषज्ञता र बहुवर्षीय अनुभवलाई विद्यार्थीहरूमा समर्पित गरेकै कारण ग्रिनल्यान्ड २०७५ सालमा शिक्षा पुरस्कार प्राप्त गर्न सफल बनेको थियो ।
कलेजले पछिल्लो एक दशकयता गुणस्तरीय शिक्षा प्रदान गर्दै आएको डाइरेक्टर पवन साहले बताए ।
ग्रिनल्यान्ड कलेजले विज्ञान संकाय, कम्प्युटर विज्ञान, व्यवस्थापन संकाय र होटेल व्यवस्थापन संकाय गरी तीनवटै मुख्य संकायहरूमा गुणस्तरीय शिक्षा प्रदान गर्दै आएको उनको भनाइ छ ।
