फाइल तस्बिर विराटनगर । मोरङको सुनवर्षी नगरपालिकामा बिहीबार राति ट्याक्टरसँग ठोक्किँदा मोटरसाइकल चालकको मृत्यु भएको छ ।
सुनवर्षी-८ विश्वकर्मा चौकस्थित सिजुवा-विराटनगर हुलाकी सडकखण्डमा झपडतलबाट डाइनियातर्फ जाँदै गरेको को १ त ६१९१ नम्बरको ट्याक्टरले र सोही दिशातर्फ जाँदै गरेको प्रदेश १-०२-०४५प.९१६३ नम्बरको मोटसाइकल ठोक्किएको थियो ।
ट्याक्टरमा पछाडिबाट ठक्कर दिइ दुर्घटना हुँदा मोटरसाइकल चालक रतुवामाई नगरपालिका-३ चौकीघाट बस्ने ४३ वर्षीय ढक्कुलाल गनगाई घाइते भएका थिए ।
छाती र घाँटीमा चोट लागेपछि उनलाई रंगेली अस्पताल रंगेलीमा ल्याइएको थियो । तर, उपचारका क्रममा राति १ः२५ बजेतिर गनगाईको मृत्यु भएको प्रहरीले जनाएको छ ।
मृतकको शव सोही अस्पतालमा नै रहेको भन्ने खबर नोबेल अस्पताल विराटनगरमा कार्यरत प्रहरी कर्मचारीले इलाका प्रहरी कार्यालय रंगेलीमा जानकारी गराएका थिए ।
दुर्घटनापछि फरार बनेका सुनवर्षी-९ बिर्ता बस्ने अन्दाजी २९ वर्षीय राजकुमार ऋषिदेवलाई राति १०ः५० बजे प्रहरीले नियन्त्रणमा लिएको छ ।
