विराटनगर । बेलायती अर्थशास्त्री इमन् बट्लरको किताब ‘एन इन्ट्रोडक्सन टु एन्टरप्रेनरशिप’ को नेपाली अनुवाद ‘उद्यमशीलता: एक परिचय’ प्रकाशित हुने भएको छ ।
बेलायतस्थित एडम स्मिथ इन्स्टिच्युटका सह-संस्थापक एवम् निर्देशकसमेत रहेका अर्थशास्त्री बट्लरको किताब विकल्प एन अल्टरनेटिभ र वि रिड प्रकाशनको सहकार्यमा नेपाली भाषामा प्रकाशन हुने भएको हो ।
पत्रकारितामा समेत सक्रिय रहेका निशान्त ढुंगानाले किताबको नेपाली अनुवाद गरेका हुन् ।
किताबमा किन उद्यमशीलताप्रति चासो राख्न आवश्यक छ भन्ने कुराको व्याख्या, उद्यमशीलताले नयाँ आविष्कार र समृद्धिमा राख्ने अर्थ, उद्यमशीलताको मुख्य विचार र उद्यमीलाई आवश्यक प्रोत्साहनलगायतका कुराहरू समावेश छन् ।
त्यस्तै, किताबमा उद्यमशीलताको वास्तविक आर्थिक भूमिका र यसका विभिन्न सिद्धान्तको बारे, उद्यमशीलताको आर्थिक, सामाजिक महत्व र विश्वका विभिन्न पेशामा उद्यमशीलताको आश्चर्यजनक व्यापकताको, उद्यमशीलताको किसिम, उद्यमशीलताले नियमनलाई अनावश्यक प्रभावमा पर्दाको खतरा र उद्यमशीलताबाट फाइदा लिन कसरी उपर्युक्त नीति निर्माण गर्ने वातावरण बनाउनु पर्छ लगायतका विचारहरू समावेश छन् ।
विकल्प एन अल्टरनेटिभका संस्थापक एवम् कार्यकारी निर्देशक वसन्त अधिकारीले किताब असार महिनाभित्र बजारमा आइसक्ने जानकारी दिए ।
