विराटनगर । करिब १४ किलोमिटर बाटो छिचोल्दै झोराहाटस्थित जनक मेमोरियल स्कुलका विद्यार्थीहरूले शनिबार बिदाको दिनलाई सदुपयोग गरेका छन् ।
बसमा खाद्यान्न सामग्री राखेर विराटनगर–१६ स्थित पूर्वान्चल बाल सेवा आश्रम पुगेका जनकका विद्यार्थीहरूले सामाजिक कार्य गरेका हुन् ।
ग्रामथान गाउँपालिका–२ झोराहाटमा रहेको जनकबाट यसपालि एसइई दिने तयारीमा रहेका ३५ जना विद्यार्थीहरूले बाल आश्रममा आश्रित बालबालिकाका लागि खाद्यान्न सामग्री सहयोग गरेका हुन् ।
प्रिन्सिपल सुनील भगत, भाइस प्रिन्सिपल समुन्द्र पराजुली, कोअर्डिनेटर ज्योति धिताल र शिक्षिका निर्मला भण्डारी तथा विद्यार्थीहरूले आश्रममा आश्रित बालबालिकाको रहनसहनबारे जिज्ञासा राखेका थिए ।
अतिरिक्त क्रियाकलापअन्तर्गत सामाजिक सेवाबारे जान्न आफूहरूले बाल आश्रममा आफूजस्तै बालबालिकालाई सहयोग गरेको विद्यार्थीहरूको भनाइ छ ।
बाल आश्रममा आश्रित बालबालिकासँग केही समय बिताउन पाउँदा र उनीहरूलाई सहयोग गर्न पाउँदा खुसी लागेको विद्यालयलकी छात्रा प्रिन्सिका खतिवडाले बताइन् ।
स्कुलका प्रिन्सिपल सुनील भगतले बर्सेनि आफूहरूले सामाजिक कार्यमा विद्यार्थीहरूलाई अग्रसर गराउने गरेको बताए ।
अघिल्लोपटक मानव सेवा आश्रममा सहयोग गरेको बताउँदै उनले यसपालि स्वतस्फूर्त रूपमा विद्यार्थीहरूले बाल आश्रममा खाद्यान्न सामग्री वितरण गरेको उनको भनाइ छ ।
यस्तै, बाल आश्रमकी संस्थापक अध्यक्ष सीता पोखरेलले जनकका विद्यार्थीहरूले सर्वश्रेष्ठ मानव जातिले गर्ने मानवीय कार्य गरेको सुनाइन् ।
आश्रममा आश्रित ६१ बालबालिकाका लागि सहयोग गरेका जनकका विद्यार्थीहरूलाई आशीर्वाद दिँदै उनले भविष्यमा पनि सामाजिक कार्यमा तल्लीन रहन सुझाव दिइन् ।
विद्यार्थीहरूलाई कक्षाकोठाबाहिरको वास्तविक संसार देखाउन र सामाजिक कार्यमा पनि उनीहरूको अग्रसरता बढाउन जनक लागिपरेको छ ।
उमेरदेखि नै सामाजिक कर्तव्य र जिम्मेवारीप्रति सचेत बनाउने ध्याउन्नमा रहेको जनले अघिल्लो वर्ष मानव सेवा आश्रममा सहयोग गरेको थियो ।
