अफ्रिकी मुलुक मालीमा भएको आतंककारी आक्रमणमा परी ३० सैनिकको ज्यान गएको छ । मालीमा रहेको एक सैन्य आधारलाई लक्षित गरी आतंककारी आक्रमण भएको हो ।
आक्रमणमा आतंककारी संगठन अल कायदामा आबद्ध लडाकुको संलग्नता रहेको अधिकारीहरुले जनाएका छन् । बुर्किना फासोको सीमानजिकै रहेको बोलकेस्सी क्षेत्रमा रहेको सैन्य आधार शिविरमा आक्रमण गरी नियन्त्रणमा लिएको अल कायदा सम्बद्ध जमाआ नुस्रत उल इस्लाम वा अल मुस्लिमिन नामक समूहले दाबी गरेको छ ।
उक्त समूहले टिम्बुक्टू शहरमा समेत आक्रमण गरेको दाबी गरेको छ । सो क्षेत्रमा रुसी सैन्य कम्पनी वाग्नरका लडाकुहरु तैनाथ रहेको बताइन्छ ।
साहारा मरुभूमिबाट दक्षिणमा पर्ने साहेल भनिने क्षेत्रमा पछिल्लो समय आतंककारी आक्रमणका घटना बढ्दै गएको छ । सो क्षेत्रका माली, बुर्किना फासो, नाइजरजस्ता मुलुकमा मे महिनाको शुरुवातदेखि भएका आक्रमणमा ४०० जनाभन्दा धेरै सैनिक मारिएका छन् ।
गत मे २४ का दिन आतंककारी लडाकुले मालीकै डिओउरास्थित सैन्य आधार शिविरमा आक्रमण गर्दा ४० सैनिक मारिएका थिए । त्यसैगरी, मे महिनाको मध्यतिर बुर्किना फासोको जिबो क्षेत्रमा भएको आक्रमणमा २ सयभन्दा धेरै सैनिक मारिएका थिए ।
त्यसैगरी, मे २४ मा नाइजरको टोहोवा र मे २६ मा डोस्सो क्षेत्रमा भएको आक्रमणमा १ सयभन्दा धेरै सैनिक मारिएका थिए ।
सन् २०२० देखि सन् २०२३ सम्म भएका सत्तापलटपछि यी मुलुकमा सैनिक सरकारले शासन चलाइरहेको छ ।
