प्रधानमन्त्री केपी शर्मा ओलीले राजसंस्थाको वकालत गरिरहेका दल र समूहको मानसिकता दरिद्रता देखेर विचित्र लागेको टिप्पणी गरेका छन् ।
नेकपा एमालेका अध्यक्ष समेत रहेका प्रधानमन्त्री ओलीले पार्टीको संसदीय दलको बैठक सम्बोधन गर्दै पूर्वराजा ज्ञानेन्द्रका समर्थकहरूको मानसिकता दरिद्रता देखेर विचित्र लागेको टिप्पणी गरेका हुन् ।
‘आजको समयमा नागरिक सर्वोच्चता हुनुहुँदैन भन्नु, व्यक्तिगत सर्वोच्चतामा देश चल्नुपर्छ भन्नु, ६८ लाख परिवार छन् नेपालमा, त्यसमध्ये एउटा परिवारले सबैमाथि शासन गर्न पाउनुपर्छ भन्ने मानसिक दरिद्रता देखेर पनि विचित्रै लाग्छ,’ ओलीले भने, ‘कस्तो मानसिकता होला ? तिनको चेतनाको स्तर देख्दा दया लागेर आउँछ । साँच्चै दया लाग्छ ।’
