विराटनगर । कोशी प्रदेशका प्राविधिक शिक्षालयहरूबीच भइरहेको ‘सीप उत्सव २०८२’ अन्तर्गत विराटनगरको आदर्श माध्यमिक विद्यालयमा सूचना र प्रविधि विधामा प्रतिस्पर्धा भएको छ ।
विराटनगर महानगरपालिका-७ मा अवस्थित विद्यालयमा भएको आन्तरिक प्रतिस्पर्धामा विद्यालयकी छात्रा पुष्पा राजवंशी विजेता भइन् भने चन्द्रावती राजवंशी उपविजेता भइन् । प्रथम र द्वितीय हुन सफल भइ फाइनल चरणमा छनोट भएका उनीहरूलाई विद्यालयका सहायक प्रधानाध्यापक इन्द्रबहादुर चौहानले ट्रफी प्रदान गरे ।
सामाजिक विकास मन्त्रालय, उद्योग संगठन मोरङ, इन्स्योर र हेल्भेटास नेपालको आयोजनामा जारी महोत्सवमा प्रदेशमा सातवटा शिक्षालयमा सीप प्रदर्शनी र प्रतिस्पर्धा भइरहेको छ । जसमा विजयी भएका आदर्शका विद्यार्थीद्वय पुष्पा र चन्द्रावतीले उद्योग संगठन मोरङमा जेठ १० र ११ गते हुने अन्तिम चरणको स्पर्धा गर्ने छन् ।
फाइनल चरणमा पनि उनीहरूले अब्बल प्रदर्शन गरेर उपाधि जित्ने आदर्शका सहायक प्रधानाध्यापक चौहानको भनाइ छ । सीप र प्राविधिक शिक्षामा सधैँ अब्बल रहँदै आएको आदर्श मा. वि. यस वर्षको अप्रेन्टिसीप कार्यक्रममा समेत प्रदेशमा नै उत्कृष्ट नतिजा ल्याउन सफल भएको सुनाए ।
यही वैशाख २२ गतेदेखि सुरु भइ ३० गतेसम्म हुने विद्यालयस्तरीय प्रतिस्पर्धाको समुद्घाटन भने विराटनगर महानगरपालिकाका कार्यकारी प्रमुख राम ढुंगेलले गरेका थिए । जसक्रममा बोल्दै उनले सीपमार्फत् विद्यार्थीहरूलाई रोजगार र उद्यमतर्फ जोड्न सीप उत्सवजस्तो उत्कृष्ट कार्यक्रमको थालनी भएको बताए ।
अप्रेन्टिसीपतर्फ २०७९, २०८० तथा २०८१ समूहका प्रशिक्षार्थी, १० महिने ट्रेनिङ विथ ओजेटीसमेतका प्राशिक्षार्थीहरूको उपस्थितिमा कार्यक्रम सम्पन्न भएको हो ।
कार्यक्रममा प्राविधिक शिक्षा तथा व्यवसायिक तालिम परिषद् कोशी प्रदेशका सूचना अधिकृत शिवशंकर दास, क्यान महासंघ मोरङका अध्यक्ष सुमितकुमार साह, टेकफिनिटी सोलुसन एन्ड रिसर्च सेन्टरका सिइओ, सुजित झा, उद्योग संगठन मोरङ सीप विकास इकाइका संयोजक सन्दीप चौधरी, विराटनगर महानगरपालिकाका रोजगार प्राविधिक कपिल थापा, आदर्श माविका प्रशिक्षक अजित चापागाईं, लालबहादुर गुरुङ, प्रवेश दुलाललगायतको उपस्थिति रहेको थियो ।
सुनसरी, मोरङ र झापाका विभिन्न प्राविधिक शिक्षालयमा आन्तरिक प्रतिस्पर्धाबाट छानिएका शीर्ष दुई प्रशिक्षार्थीहरूले फाइनल चरणमा स्पर्धा गर्ने इन्स्योर परियोजनाका घनश्याम लिम्बुको भनाइ छ ।
सीप उत्सवअन्तर्गत होटल व्यवस्थापन, सूचना प्रविधि र अटो मोबाइल इन्जिनियरिङतर्फ सीप प्रदर्शनी र प्रतिस्पर्धा भइरहेको छ, जसमा एक हजारभन्दा बढी युवाहरूले वृत्ति परामर्श, सीप अवलोकन तथा सीप अनुभव गरिरहेका छन् ।
