विराटनगर । सुनसरीको धरान उपमहानगरपालिकाबाट चोरी भएको बस कोशी प्रदेशको राजधानी विराटनगरमा फेला परेको छ ।
धरान-८ दुर्गापथस्थित ग्यारेजबाट चोरी भएको प्रदेश १ को ९७४९ नम्बरको बस मंगलबार दिउँसो विराटनगर महानगरपालिका – १२ मंगलबारेमा भेटिएको हो ।
धरानबाट शुक्रबार बिहानको राति चोरी भएको बस खोजी गर्ने क्रममा पाटपूर्जा निकालिएको अवस्थामा विराटनगरमा भेटिएको हो ।
बसको अगाडिको सिसाको माथिल्लो भागमा सिद्धदेवी यातायात र तल्लो भागमा याक्थुङ यातायात लेखिएको छ ।
धरानबाट चोरी भएको बस पूर्वपश्चिम हाइवेमा पर्ने खोर्सानेसम्म पुगेको सिसीक्यामेरामा देखिएको थियो ।
मंगलबार मंगलबारेमा वेवारिसे अवस्थामा बस देखिएपछि स्थानीयले प्रहरीलाई खबर गरेका थिए ।
बस चोरी गर्ने गिरोहको खोजी भइरहेको प्रहरीले बताएको छ ।
